Кездесу негізінен құқық қорғау саласына қатысты болғандықтан, ең басты талап қоғамдық тәртіп екені баса айтылды. Жиын барысында халық қалаулылары департамент қызметкерлері тарапынан қолданыстағы заңға қатысты айтылған ұсыныстарды тыңдады.
Жамбыл өңіріне сапары барысында сенаторлар Тараз қаласындағы құқық қорғау қызметі орталығының жұмысын көрді.
– Қазір Сенат депутаттары барлық өңірде жүр. Олар облыстарда естіген, көрген мәселелерін әрі қарай депутаттық сауалдар арқылы немесе дөңгелек үстелдерде, үлкен жиналыстарда көтеріп, заңнаманы уақыт талабына сәйкестендіруге атсалысады. Қыркүйек айының басында Парламент кезекті сессиясын жалғастырады. Сонда осы айтылған мәселелердің барлығы ортаға салынатын болады, – деген Бектас Бекназаров бірқатар мәселеге тоқталды. Сонымен қатар Сенат Төрағасының орынбасары Жамбыл облысы халқының жартысынан көбіне әлі көгілдір отын жетпегенін, осы газ мәселесі 2022 жылға дейін шешілуі керектігін айтты.
Сенаторлардың Жамбыл өңіріндегі жұмыс сапары Тараз қаласының кәсіпкерлерге қызмет көрсету орталығының жұмысымен танысумен жалғасты. Бұдан кейін халық қалаулылары Байзақ ауданы, Бурыл ауылдық округіндегі «Яшар» шаруа қожалығының егін алқаптарының жұмысымен, Көктал ауылындағы «Дулат» шаруа қожалығының жұмысымен және осы аудандағы бірқатар нысанның қызметімен танысты.
Сенат Төрағасының орынбасары Бектас Бекназаров пен Сенат депутаты Абдалы Нұралиев Жамбыл облысына жұмыс сапары барысында облыс әкімі Асқар Мырзахметовпен кездесті. Шағын құрамдағы басқосуда бірқатар өзекті мәселе айтылып, шешу жолдары қарастырылды. Бектас Бекназаров бүгінде Жамбыл өңірінде айтарлықтай жұмыс атқарылып жатқанына тоқталды. Бұл тұрғыда Асқар Мырзахметов сенаторларға облыс үшін маңызды мәселелерді айтты. Жиын соңында өткен алты айда Жамбыл облысында ауыл шаруашылығы, өнеркәсіп пен кәсіпкерлік саласын дамытудың жол картасы әзірленгендігі, мәселені шешу үшін оның арнайы тетігі қарастырылғандығы жөнінде айтылды. Бұдан кейін сенаторлардың Жамбыл облысына жұмыс сапары Жамбыл және Жуалы аудандарында жалғасын тапты. Сенаторлар аудандардағы бірқатар әлеуметтік-кәсіпкерлік нысанның жұмыстарымен танысты.
Хамит Есаман,
«Егемен Қазақстан»
Жамбыл облысы