Ата Заң – ата-бабалар армандаған азаттығыңды айқындайтын, егемендігіңді паш ететін, Тәуелсіз ел екендігіңді танытатын, дербес мемлекеттігіңді көрсететін қастерлі құжат. Ата Заң – елдігіміздің тірегі, азаматтың арқа сүйер алтын арқауы. Біздің күллі тыныс-тіршілігіміз, өмір салтымыз, қоғамның тамыр бүлкілі – барлығы негізгі Заңнан бастау алатындығы рас. Ата Заң – тал бесіктен, жер бесікке дейінгі уақыт аралығында сіздің құқығыңызды қорғайды. Ата Заң – ел азаматының конституциялық құқын танытатын, әр отандасымыз бұлжытпай орындайтын заңдардың алтын арқауы, темірқазығы. Ата Заң – бабалар аманаты. Кешегі Қасымның «Қасқа жолы», Есімнің «Ескі жолы», әз Тәукенің «Жеті жарғысының» жалғасы, заңды мұрагері
– Қазақ елінің бүгінгі Конституциясы. Тарихтың терең қойнауына үңілер болсақ, алғашқы Қазақ хандығы құрылғанда ата-бабалар дәстүрімен қатар, 1511 жылы 19-баптан тұратын Негізгі заң қабылданған. Оған қазақ «Қасым ханның қасқа жолы» деп ат қойып, айдар таққан болатын. Әлі де солай аталады. 1690 жылы Тәуке хан «Жеті жарғыны» қабылдады. Бұл Заң – жеті әдеттік құқықтық жүйеден тұратын қоғамдық қатынастарды реттейтін салалардың жиынтығы. «Жеті жарғыны» жасауға Ұлы даланың данагөй билері белсене атсалысыпты.
Аты аңызға айналған атақты Төле би қайтыс болар алдында үш жүздің игі жақсыларын жинап алып: «Аттың құнын, ердің құнын, әйелдің құнын өз ақылымызбен шешкен жөн» деп кеңес берген екен. «Малға салсаң баспайтын, ұрсаң шаппайтын жабы бар да, қусаң жететін, қашсаң құтқаратын желден жүйрік тұлпар бар, екі адамның басы қосылса өсек айтатын әйел бар да, бір елге ана, пана болатын әйел бар. Шешім айтқанда осылардың аражігін ашып, екшеп барып, құн кесулеріңді өтінем», – деп аманаттапты артта қалып бара жатқан ел ағаларына.
Ата Заң – ұлтаралық татулықтың алтын діңгегі. Бүкіл халықтың игілігін көздейтін Конституция қоғам мен биліктің тұрақтылығын қамтамасыз етіп қана қоймай, Қазақстанның әлем таныған мемлекетке айналуына оң ықпал етті. Еліміз зайырлы мемлекет. Ел басына күн туып, ер етігімен су кешкен қиын-қыстау замандарда киіз туырлықты қазақ ұлтын ұлт ретінде сақтап қалған бірлігі мен ынтымағы десек, артық айтқанымыз емес. Қазақстанның көпэтносты халқының татулығы, ынтымақтастығы, бейбітшілігі – біздің еліміздің ең басты байлығы. Оны көздің қарашығындай сақтауға тырысуымыз керек.
Мемлекет басшысының салиқалы саясатының арқасында біз қазіргі күні экономикалық жетістіктерге, әлеуметтік игіліктерге, саяси тұрақтылық пен мәдени өркендеуге қол жеткізіп отырмыз. Елдің қол жеткен табыстарына, біздегі орын алған татулық пен түсіністік жағдайларына әлемдік өркениет қызығушылық танытуда. Жетістіктеріміз оңайлықпен келіп жатқан жоқ. Бұл ең алдымен ынтымақтастығымыз бен бірлігіміздің арқасында жетіп отырған игілікті нәтижелер. Біздің мақсатымыз – қазақ жерін мекен еткен халықтың ауызбірлігін бұзбай, мемлекеттің әлеуетін арттырып, әлемдік көштен кенже қалмай, дамыған 30 ел қатарынан көріну. Осы орайда Конституция қағидаттарына адал болып, оған құрметпен қараудың маңызы зор. Өйткені Ата Заңын бағалай білген ел ғана алдыңғы қатардан көрінеді.
Гаухар АЛДАМБЕРГЕНОВА,
Қазақ мемлекеттік қыздар педагогикалық университетінің ректоры, педагогика ғылымдарының докторы, профессор