Оқушылардың алаңсыз білім алуы үшін мемлекет тарапынан айтарлықтай қолдау көрсетіліп келеді. Бірқатар өңір жаңа оқу жылын жаңа мектептермен бастайды. Елбасының жаңа оқу орындарын құру мен үш ауысымды мектеп мәселесін шешу бойынша жүктеген міндетін орындау аясында мектеп құрылыстары қызу жүргізілуде.
Білім және ғылым министрлігі баспасөз қызметінің мәлімдеуінше, биыл республикалық бюджет есебінен 53 млрд теңгеге 110 мектеп салынған. Бұған дейін хабарлағанымыздай, биыл 72 мектеп пайдаланылуға беріледі. Оның ішінде 49 мектеп 1 қыркүйек күні есігін ашса, жыл соңына дейін 23 мектеп пайдаланылуға беріледі деп жоспарланған.
72 мектептің үшеуі – Ақмола облысында, ал Ақтөбе өңірінде – 9, Алматы облысында – 6, Шығыс Қазақстан облысында – 1, Жамбыл облысында – 4, Батыс Қазақстан облысында – 3, Қарағандыда – 3, Қызылордада – 5, Маңғыстауда – 8, Түркістанда – 20, Алматы қаласында – 7, Астана қаласында 3 білім ошағы салынған.
2015-2017 жылдары «Нұрлы жол» мемлекеттік бағдарламасы аясында мектептердің құрылысына 135 млрд теңге бөлінгенін айта кеткеніміз жөн. Бұл қаражатқа 108 мектеп бой көтерген. Жалпы, 3 жылдың ішінде ұлттық қор, республикалық және жергілікті бюджет есебінен 347 жаңа мектеп салынған. Яғни 235 жаңа білім ошағын салу жоспарланғанымен, жоспар 147 процентке асыра орындалды.
Министрлік өкілдерінің айтуынша, биыл жекеменшік мектептердің құрылысын ынталандыру бойынша шаралар нәтижелі жүргізілуде. Атап айтсақ, «Білім туралы» Заңға сәйкес, мемлекеттік білім беру тапсырысын жекеменшік мектептерге орналастыруға мүмкіндік беретін толықтырулар енгізілді.
Жаңа оқу жылының жағымды жаңалықтарының бірі цифрландыру, IT технологиялар мен робототехниканы дамыту үшін қосымша білім беру мүмкіндіктерінің кең арнаға түскендігі. Өңірлердегі жергілікті атқарушы органдар робототехника, бағдарламалау, 3D-принтинг сыныптарын ашуда ілкімді істермен қуантуда. Қазіргі уақытта 1 500 мектепте цифрланған сыныптар жұмыс істейді. Алдағы уақытта барлық өңірде IT-лицейлерін ашу жоспарланған. Одан бөлек цифрлы білім беру ресурстары белсенді қолданылып, министрлік ұсынысымен жаңа оқу жылынан бастап әр балаға жеке логин беріледі. Енді цифрлы ресурстар үйде де, мектепте де бәріне қолжетімді болады.
Мирас АСАН,
«Егемен Қазақстан»
