Қазақстан Мұсылмандары діни басқармасының Өскемен аймағы өкілдігінің имамдары «Мектепке – жол» акциясы аясында облыстық Халифа Алтай мешітінде екі жүзге жуық оқушыға оқу құралдары мен сөмкелерді табыс етті. Бұл күні аз қамтылған және көп балалы отбасынан шыққан, жетім және ата-ана қамқорлығынсыз қалған балалар мектепке қажетті құрал-жабдықтарды алып, бір қуанды.
«Балалардың барлығына бірдей мейіріммен қарап, қамқорлық таныту керек. Кезінде Пайғамбарымыздың (с.ғ.с.) немерелерінің бірін сүйіп жатқанын көрген Әқра ибн Хаабис (р.а.): «Менің он балам бар, ешқайсысын да әлі маңдайынан сипап көрген емеспін» депті. Сонда Пайғамбарымыз (с.ғ.с.) оған: «Сен басқаға мейірбандық көрсетпесең, саған да Алла мейірбандық көрсетпейді», деп жауап беріпті. Сол себептен, жақсылық жасасаңыз, алдымен балаларыңыздан бастаңыз», дейді облыстық Халифа Алтай мешітінің наиб имамы Дәулет Қабидолдин.
Өскемен қаласының тұрғыны Алмагүл Тұқмаилованың қызы Диляра Қ.Нұрғалиев атындағы №43 мектеп-лицейінде оқиды. «Жалғызбасты анамын. Балам екеуміз пәтер жалдап тұрамыз. Сол себептен бізге осындай қамқорлық танытып, қолдау көрсеткен ұйымдастырушыларға алғысым шексіз», дейді ол.
Азамат ҚАСЫМ,
«Егемен Қазақстан»
ӨСКЕМЕН
