Германияның Transfermarkt сайты ұсынған мәліметке сенсек, К тобындағылар арасындағы ең ауқаттысы – «Ренн». Франциялық клубтың сапындағы ойыншылардың жалпы құны 119 миллион 50 мың еуроны құрайды. Сол сайыпқырандар арасында Исмаил Саррды бөле-жара атап өтуге болады. 20 жастағы сенегалдық жартылай қорғаушының трансферлік құны 14 миллион шамасында.
Екінші орында – «Динамо». Украинаның астанасында іргетасы қаланған даңқты команданың футболшылары бүгінгі таңда 67 миллион еуроға бағаланып отыр. Солардың қатарында ең құнды ойыншы ретінде Виктор Цыганковтың есімі аталуда. 20 жастағы жартылай қорғаушының бағасы 8 миллионды құрайды.
Үшінші сатыға «Астана» жайғасты. Қазақстандық клубтың намысын қорғап жүрген теңбіл доп шеберлерінің жалпы құны – 24 миллион 150 мың еуро. Солардың арасындағы ең бағасы жоғары Педро Энрике. 28 жастағы Бразилияның шабуылшысының құны – 3 миллион шамасында.
Ал ең соңғы орында – «Яблонец». Чехиялық команда 12 миллион 250 мың еуроға бағаланып отыр. Олардың ең құнды ойыншысы, 24 жастағы жартылай қорғаушы Михал Травник 1 миллионға бағалануда.
Ғалым СҮЛЕЙМЕН,
«Егемен Қазақстан»