Суреттерді түсірген Ерлан ОМАР
Мәдениет және спорт министрлігінің Тіл саясаты комитеті және Шайсұлтан Шаяхметов атындағы «Тіл-Қазына» ұлттық ғылыми-практикалық орталығы ұйымдастарған айтулы шараға қойғам қайраткерлері, шығармашылық зиялы қауым өкілдері, ғалымдар қатысты. «Өткен жылы Елбасы Нұрсұлтан Назарбаев «Қазақ тілі әліпбиін кириллицадан латын графикасына көшіру туралы» Жарлыққа қол қойды. Оны іске асыру үшін Үкімет жанынан Ұлттық комиссия құрылды. Үкімет 2025 жылға дейін латын графикасына кезең кезеңмен көшірудің жоспарын бекітті. Біз «Тіл-Қазына» ғылыми-практикалық орталығын құрдық. Қазір республикамызда латын графикасына негізделген жаңа емле ережесі апробациядан өтуде. Бұл бәріміз жұмыла кірісетін ұлттық жұмыс» деді, Мәдениет және спорт министр Арыстанбек Мұхамедиұлы.
Тіл мерекесінің 5 қыркүйек болып белгіленуінің де өзіндік себебі бар. Бұл күн – «Ұлттың сақталуына да, жоғалуына да себеп болатын нәрсенің қуаттысы – тіл» деп ұлағатты сөз қалдырған, қазақ халқының тағдыры, тілі үшін күрескен Алаш арысы, Ұлт ұстазы Ахмет Байтұрсынұлының туған күні. Қазақтың әдебиет зерттеуші ғалымы, түркітанушы, публицист, педагог, аудармашы, қоғам қайраткері Ахмет Байтұрсынұлы 1872 жылы 5 қыркүйекте қазіргі Қостанай облысы, Жангелдин ауданы, Сарытүбек елді мекенінде дүниеге келген болатын.
Ал республикалық жас ақындар байқауына 36 автордан 70-ке жуық материал келіп түскен. «Елбасы және елорда» жыр жинағына 36 автордың 66 өлеңі енгізілді. Ережеге сәйкес қаламгерлер өлеңдеріне Қазақстанның даму жолында Елбасының сіңірген еңбегі мен Арқа төсіндегі жас Астананың 20 жылдық мерейтойын арқау еткен.
Мүшайраға ұсынылған шығармаларды елімізге белгілі ақындар мен филолог ғалымдардан құрылған арнайы қазылар алқасы сараптап, жеңімпаз бен жүлдегерлерді анықтаған.
Бағашар ТҰРСЫНБАЙҰЛЫ,
«Егемен Қазақстан»
