Орталық жұмысының негізгі бағыттары тұрғындар өтініштерін қабылдау, орын алған жағдаяттарды, апаттарды шешуде коммуналдық және шұғыл қызметтер жұмысын үйлестіру, туындаған мәселелердің уақтылы шешілуін бақылау, құқықбұзушылық жайттарды анықтау және өңдеу, алдын алу шаралары саясатын құру, сонымен қатар орын алған оқиғаларды қалалық бейнебақылау жүйесі арқылы «дәл осы жерде және қазір» тәртібінде шұғыл қадағалауды қамтиды. Ал бірыңғай фронт-кеңсенің атқаратын жұмысы – тұрғындар мәселелерінің 90%-ке дейінгі көлемін қашықтықтан шұғыл деңгейде шешуге бағытталған. «Бүгінгі таңда тұрғындар өтініштерінің 77%-ті бірінші қоңыраудан кейін-ақ шешіледі және аталған көрсеткішті 85%-ке дейін жеткізу жоспарланып отыр», дейді орталықтың мамандары.
Мәселелерді қашықтықтан шешу тұрғындар уақытын айтарлықтай үнемдейді, тұрғынға әкімдікке барып, белгілі бір мәселе бойынша қайда және қалай жүгінуге болатынын түсіну үшін басқармалар, коммуналдық кәсіпорындар құрылымын анықтап жатудың қажеті жоқ. Ағымдағы жылды өткен жылдың дәл осы кезеңімен салыстырғанда Астана қаласы әкімдігіне ресми өтініштер санының 20%-ке азайғаны байқалады. iKomek орталығының операторлары тұрғындардың өтініштерін барлық байланыс арналарынан (телефон байланысы, әлеуметтік желілер, facebook пен telegram-дағы чот-боттар) қабылдайды. Оны өңдеп, түйткілдің белгіленген мерзімде жойылуы үшін әрі қарай мемлекеттік органдарға, коммуналдық қызметтерге беру мақсатында тіркеу нөмірін бере отырып, Астана қаласы тұрғындары өтініштерінің тізіміне енгізеді.
Айта кететін тағы бір жайт, қызмет көрсету функциялары артқан iKomek орталығы құрылған сәттен бастап, 2018 жылдың 8 айы ішінде 515 мың өтініш қабылданған. Оның ішінде 1050-і қаралуда, ал 2017 жылы 400 мыңға жуық өтініш қаралған. Бұл қала тұрғындарының елорда өміріне белсене араласа бастағанын, сонымен қатар тұрғындар үшін қызмет көрсететін салалардың артуын білдіреді. Және де бүгінде Астана қаласы әкімдігінің iKomek бірыңғай байланыс орталығы қалалық басқармалардың және «Астана-ЕРЦ», «Астана Су Арнасы», «Астана-LRT», «Астана Теплотранзит», «Астана-ӨЭК» сияқты коммуналдық кәсіпорындардың барлық колл-орталықтарын біріктіреді және қала тұрғындарымен байланысатын жалғыз орын саналатынын айта кеткен абзал.
iKomek орталығына қала аумағында орналасқан 4 мыңнан астам камера қосылған. Негізінен камералар сауда-ойын-сауық орталықтары, мешіттер, ірі аялдамалар, вокзалдар сияқты адамдар көп жиналатын жерлерді қамтиды. Қалалық бейнебақылау жүйесі арқылы iKomek орталығының операторлары тәулік бойы мектеп, аула, үйлердің кіреберістері және т.б. кешендердің аумағын бақылайды. Бүгінгі таңда «Сергек», «Қазақтелеком» АҚ (тұрғын үйлердің кіреберістері мен аулаларында) камералары мен басқа қалалық камераларды қосу бойынша жұмыстар жүргізілуде.
Өткенде Сыбайлас жемқорлыққа қарсы іс-қимыл агенттігінің төрағасы Алик Шпекбаев жұмыс бабымен Астанадағы iKomek жедел əрекет орталығына барып, орталықтың тыныс-тіршілігімен танысқан болатын. Таныстырылым барысында қала басшысы кез келген шағым түрлері тез арада назарға алынатынын алға тартты.
«Әлеуметтік желілер əр 10 минут сайын қаралып тұрады. 109-ға көшеде шылымның қалдығын тастаудан бастап, электр қуаты сөніп қалған жағдайда оперативті түрде жұмыс командасын бағыттауға дейінгі барлық бақылау, жедел əрекет ету қызмет түрлері кіреді. iKomek бейнебақылау арқылы қаланың барлық ауданында, көшенің бұрыш-бұрышында кім не істеп жатыр – бəрі көз алдымызда. Тәулік бойы бақылаудың арқасында біз бүгінде қаланың қай көшелерінде жиі жол ережесі бұзылатынын біліп отырмыз, сол бойынша тиісті шаралар қабылдануда. Бүгінге дейін жиі мазалап келген проблеманың бірі – құдықтардың қақпағын ұрлау. Бейнебақылау мен 109-ға хабарласу нəтижесінде ұрлық тыйылған. Тағы бір айта кететін мəселе – қала тұрғындарының белсенділігі. Халық қаланың көшелерінен қандай да бір шұғыл жөндеу немесе əрекет ету проблемаларын өздері 109-ға хабарласып біле алады. Бұл – халықтың жаны ашитындығының белгісі», деді елорда басшысы.
Бейнебақылау камераларының арқасында азаматтар еш алаңдамай, құқықтық тәртіптің қамтамасыз етілуіне сенімді бола алады. Себебі камераларды пайдалану құқықбұзушылықтар деңгейін төмендетуге мүмкіндік береді. Осылайша, «нөлдік төзушілік» қағидасын ұстана отырып, iKomek орталығының операторлары белгіленбеген жерге қоқыс тастау, көлікті дұрыс қоймау, темекі тұқылының қоқыс жәшігінің маңына тасталуы жайттарын тіркейді, рұқсатсыз төгілген қоқыс алаңдарын, көшелер мен КТҮ аулаларын су басуды және басқа да құқықбұзушылықтарды анықтайды. Мұнан басқа, анағұрлым тиімді үйлестіруді және қауіпсіздікке орталықтандырылған мониторинг жасауды қамтамасыз ету үшін iKomek орталығында Астана қаласы Ішкі істер департаментінің қызметкерлері отырады. Бұлайша бірлесіп жұмыс істеу нәтижесінде 2018 жылдың басынан бері ІІД желісі бойынша 2284 өтініш қабылданған, оның ішінде 2175 өңделген, ТЖД желісі бойынша 138 өтініш қабылданып, оның ішінен 137-і өңделген. Осылайша, бүгінгі таңда iKomek орталығы елорда өмірін ұдайы жақсартуға және дамытуға септесетін бірден-бір мекеме болып отыр.
Рауан ҚАЙДАР,
«Егемен Қазақстан»