– Мұндай көрмелерге қатысу – әрбір өнерлі жас үшін өзіндік емтихан іспетті. Арнайы комиссия жұмыстарды іріктегенімен, суретшілерге қатаң талаптар қойылған жоқ. Көрмеде суретшілер үшін өзге де әріптестерінің туындылары қатар қойылды. Осындай салыстырулар қылқалам иелеріне өз жұмыстарына басқа көзбен қарап, шеберліктерін шыңдауға көмектеседі. Қазіргі таңда суретшілер реализмді өте сирек салатын болды. Олар көбіне өзінің ішкі жан дүниесіне көз салады: суреттерде стилизация көп, қиял-ғажайып сюжеттер жиі кездеседі. Туындыларын көпшілік назарына ұсынбас бұрын, олардың әрқайсысы өзін-өзі сырттай бағалаулары тиіс, – дейді өнертанушы Наталья Иванина.
Көрмедегі ел назарын аударған туындының бірі – Бұқар жырауға арналған гипстен жасалған мүсінше болды. Ол араб жазбасымен және әшекейлермен безендірілген ханның бас киімі бейнесінде жасалған.
– Бұл идеяны жүзеге асыру үшін үш жыл бойы ақпарат жинап, тарихшылармен, имамдармен кеңестім. Мүсіннің негізгі ортаңғы тік бөлігі жеті ханның мөрімен әрленген, ол Бұқар жырау жеті ханның кеңесшісі болғанын білдіреді. Барлық мөрлер тамшы іспеттес – ол қан тамшысын білдіреді. Осындай пішінді мөр тек ханда ғана болатын, себебі хан ғана соғысты бастауға бұйрық бере алған. Мүсіннің қырларында араб тілінде сегіз жазба бар – ол мұсылманның басты сегіз қасиеті. Ең жоғары жағында дала бүркіті бейнеленген, бір қырынан қараса барлық мұсылмандардың белгісі – жарты айшық секілді көрінеді, – дейді мүсін авторы Амантай Әкішев.
Қайрат ӘБІЛДА,
«Егемен Қазақстан»
ҚАРАҒАНДЫ