Осы бір демеу әсіресе, жалғызбасты аналарға жақсы болып тұр. Жұмыспен қамту орталықтары көмектің бұл түрі шалғайдағы шағын ауылдар үшін маңызды екендігін айтып отыр. Әлеуметтік жағынан аз қамтылған отбасылар үшін қалай болған күнде де тәп-тәуір талғажау. Көмек аясында жәрдемақымен қоса тұрғындарға тұрақты табыс көзі, жұмыс орны да ұсынылады. Қорғалжын аудандық жұмыспен қамту орталығы осы жылы 700-ге жуық тұрғынды әлеуметтік көмекпен қамтуға тиіс болатын.
– Атаулы көмек бойынша биыл республикалық бюджеттен 17 миллион 363 мың теңге қаражат бөлінді. Бұл қаражат 105 отбасыға есептеліп отыр. Әзірге 480 адамды құрайтын 96 отбасы қамтылды. Көмектің екі түрі бар: шартты және шартсыз. Көмек алу үшін әлеуметтік жағдайы төмен отбасылар, мүгедектер мен көпбалалы отбасылар өтінім жасай алады. Шартсыз әлеуметтік көмек дегеніміз – жалғыз басты аналарға, зейнеткерлерге, бірінші және екінші топтағы мүгедектерге ай сайын төленетін төлем. Шартты көмек жұмыспен қамтуға жәрдемдесу және қажет болған жағдайда әлеуметтік бейімдеу шараларына қатысуды көздейді, – дейді аудандық жұмыспен қамту орталығының директоры Асылбек Мұстафин.
Жоғарыда айтылған көмек түрлері 3-6 айға тағайындалады екен. Қажет болған тұста мерзімі одан да ұзартылуы мүмкін. Осындай шараның нәтижесінде тұрмысын жақсартқан адамдардың бірі – Зулфия Идиятуллина. Жалғызбасты анаға орталық мамандары тұрақты жұмыс орнын тауып беріпті.
– Әлеуметтік көмек қысылғанда көп-көрім демеу болды. Орталық мамандары ел ішінде әлеуметтік көмек туралы ақпарат таратты. Мен құжаттарымды жинап бардым. Комиссия отырысынан кейін ай сайын өзіме және балаларыма 47672 теңге көмек көрсетілетін болды. Бұл шалғайдағы шағын ауылдың жұмыссыз отырған тұрғыны үшін нәпақа. Ең бастысы, жергілікті қорыққа бағбан болып жұмысқа орналастым, – дейді ол.
Тұрақты жұмыс істеп, табыс тапқанға не жетсін, шіркін. Қазір жалғызбасты ана ешкімге алақан жайып отырған жоқ. Өз еңбегінің арқасында жетіліп келеді. Балаларын да жаңа оқу жылына жақсылап әзірледі.
Атаулы әлеуметтік көмек бірдің ғана емес, мыңның жағдайын жақсартуға септігін тигізіп отыр. Қарапайым халық көңілге дем берген көмек өз еңбегіне жалынатын кәсіп тауып беруімен құнды дейді.
Байқал БАЙӘДІЛ,
«Егемен Қазақстан»
Ақмола облысы,
Қорғалжын ауданы
