Сондай-ақ жиын қонақтары қатарында Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшелері, Парламент депутаттары, мемлекеттік органдар, «Атамекен» ҰКП, үкіметтік емес ұйымдар, кәсіпкер әйелдер қоғамдастығы өкілдері болды.
Құттықтау сөзінде Гүлшара Әбдіқалықова ел Президенті Н.Ә.Назарбаев Қазақстан мен Өзбекстан арасындағы екіжақты қарым-қатынастың дамуына айрықша көңіл бөлетінін атап өтті.
Мемлекеттік хатшы Елбасының екі халықтың қарым-қатынасының нағыз бауырластық сипаты өз тамырын сонау ғасырлар қойнауына тартып, ата-бабаларымыздың даңқты ортақ тарихы мен бай рухани мұрасы арқылы бекіп жатқаны жөніндегі сөзін мысал етті.
Г.Әбдіқалықова Қазақстанда әйелдердің экономикалық мүмкіндіктерін кеңейтуге бағытталған мемлекеттік саясат жүргізіліп отырғанын айтты.
– Демократиялық қоғам құрудың негізгі бағытының бірі гендерлік үйлесімге қол жеткізу болып саналады. Тәуелсіздік жылдарында қомақты нәтижелерге қол жетті. Біздің елімізде әйелдердің саясатқа араласуы жөнінен үлкен ілгерілеушілік болды. Мәжілісте 29 әйел бар, яғни олар депутаттардың жалпы санының 27%-інен асады. Экономикада қарқынды түрде кәсіпкер әйелдер секторы қалыптасты. Шағын және орта бизнес субъектілерінің 44%-ін әйелдер басқарады, олар бұл саладағы барлық жұмыс орнының үштен бірін қамтамасыз етіп отыр, – деді Мемлекеттік хатшы.
Форумда Қазақстан Президенті жанындағы Әйелдер істері және отбасылық-демографиялық саясат жөніндегі ұлттық комиссия мен Өзбекстан Әйелдер комитеті арасындағы ынтымақтастық туралы меморандумға қол қойылды. Қазақстан мен Өзбекстанның кәсіпкер әйелдерінің инновациялық бизнес-жобалары назарға ұсынылды, сындарлы түрде озық тәжірибе алмасу жүзеге асырылды.
Мемлекеттік хатшы Г.Әбдіқалықова форум аясында Өзбекстан Премьер-министрінің орынбасары, Әйелдер комитетінің төрайымы Т.Нарбаевамен бірге әйелдер бизнес қоғамдастығы ынтымақтастығының, сондай-ақ әйелдердің рөлін арттыру мен мүмкіндіктерін кеңейтудің өзекті мәселелерін талқылады.
Венера ТҮГЕЛБАЙ,
«Егемен Қазақстан»