Көмір тапшылығы жоқ
Үкімет басшысының өңірдегі жұмыс сапары Екібастұз қаласынан басталды. Премьер-Министр «Еуроазиаттық энергетикалық корпорация» АҚ құрамына кіретін «Восточный» көмір разрезін аралау барысында өңірдің алдағы жылу маусымына дайындығымен танысты. Облыс әкімінің бірінші орынбасары Ұ.Жазылбек биылғы жеті айдың қортындысы бойынша көмір өндіру көлемінің 3,5%-ке өскенін айтты. Облыс қажетіне жұмсалатын көмір қоры шамамен 120 мың тоннаны құрайды. Қазір отын базаларында халыққа арналған 18 мың тонна көмір бар. Көмір еркін сатылымда, тапшылық байқалмайды. Әлеуметтік сала нысандарына 183,3 мың тонна көлемінде қатты отынды сатып алуға 1,376 млрд теңге қаражат қарастырылған. Тұтыну орындарына 176 мың тонна жеткізілді, бұл жұмыс кестеге сәйкес орындалып жатыр. «Еуроазиаттық энергетикалық корпорация» АҚ президенті В.Гриненко еліміздегі энергетикалық көмірдің 20%-ке жуығы «Восточный» көмір разрезінің үлесіне тиесілі екенін жеткізді. Б.Сағынтаев өндірістік процестің технологиялық желісімен танысып, елімізде теңдесі жоқ жаңа өнеркәсіптік нысанды – жылына 10 млн м3
аршыма тау жыныстары қуатымен циклды-толассыз аршыма тау жыныстары кешені жобасын іске қосты. «Биыл 18 млн тонна қатты отын өндіруді көздеп отырмыз, бұл былтырғы көлемнен 1 млн тоннаға артық. Көмір қазу өнімділігі жоғары заманауи машиналар арқылы іске асырылуда. Өндірісті технологиялық жарақтандыру деңгейі жыл сайын артып келеді, бұл өндірілетін көмір сапасын арттыруға және еңбек қауіпсіздігі деңгейін жақсартуға жол ашады», деді В.Гриненко. Екінші кезеңнің құрылысын алдағы бірнеше жылда жүргізу жоспарланып отыр, құрылыстың соңғы үшінші кезеңі жылына 20 млн м3 жылдық өнімділікке қол жеткізумен 2027 жылға ауыстырылды. Іс жүзінде барлық жұмыстарды отандық мердігер ұйымдар және ЕЭК қызметкерлері орындады. Жоба экологиялық таза технологияларды енгізуді, басқаруды автоматтандыруды кеңейтуді, табиғи ресурстарды ұтымды пайдалануды және табиғатты қорғау шараларының тиімділігін арттыруды көздейді. Өз кезегінде «Екібастұз МАЭС-1» ЖШС-нің бас директоры М.Әбішев биыл қуаты 325 МВт болатын №5 энергетикалық блок іске қосылатынын хабарлады. Бүгінде 5 энергетикалық блок пен жалпы қуаттылығы 2105 МВт болатын 2 турбина жаңғыртылған. 2024 жылы «Екібастұз МАЭС-1» барлық 8 энергетикалық блогын жобалық қуатына қоспақ.
Үкімет басшысы «БНКА Энерджи» ЖШС-нің техникалық мүмкіндігін бағалап, кәсіпорынның даму жоспарымен танысты. Серіктестіктің техникалық директоры Ж.Әлдебергенов дата-орталықта атқарылып жатқан жұмысты баяндады. Жоба бірнеше кезеңде жүзеге асырылуда. Алғашқысы
6 тамызда жұмысын бастаса, қазір компания 4 МВт электр энергиясын тұтынады. Жоспар бойынша 20 қыркүйекте қосылатын келесі компанияда бұл көрсеткіш 11 МВт дейін артпақ. Одан кейінгі белес 10 қарашада 18 МВт көрсеткішімен бағындырылады. Жыл соңында «БНКА Энерджи» ЖШС 33 МВт тұтынуды жоспарлап отыр. Компания майнингтік фермаларға хостинг қызметін ұсынумен де айналысады. Орталықтың осы өңірде ашылуына электр қуатының артылуы мен тарифінің төмендігі, кәсіби деңгейі жоғары мамандардың болуы себеп болып отыр. Енді ірі майнингтік фермалар мен компаниялар тартылса, Павлодар өңірі еліміздегі блокчейн-технологияларды қолданатын алдыңғы қатарлы орталыққа айналмақ. Бүгінде құны 5,7 млрд теңге тұратын орталықта 16 адам жұмыс істейді. Жоба аяқталғаннан кейін 60-қа жуық жұмыс орны құрылады. Тоқсан сайын мамандар Қытайға біліктілікті арттыру үшін майнинг-жабдықтар шығарылатын зауытқа жіберіледі.
Сондай-ақ Премьер-Министр Екібастұз қаласындағы №36 орта мектепте жергілікті мектептердің қамқоршылар кеңесі, ата-аналар комитеті өкілдерімен кездесіп, білім жүйесін дамытудың мәселелерін талқылады. Мәселен, №18 мектептің өкілі А.Армангүл 1 сынып оқушыларын мемлекеттік тілдегі оқыту материалдарымен қамтамасыз етуді көтерсе, №17 мектеп өкілі С.Ақнұрова аралас мектептердің жұмысын жетілдіру жайын қозғады. №35 мектептен В.Колодюк әлеуметтік педагог, мектеп психологы мен әдіскерлердің жалақысын көтеру мәселелері туралы айтты. Қатысушылардың сұрақтарына Б.Сағынтаев пен Білім және ғылым министрі Е.Сағадиев жауап берді.
Сондай-ақ Премьер-Министрге «Қазақтелеком» АҚ пен Hewlett-Packard компаниясының бірлескен жобасы, ТМД-дағы ең ірі деректер орталығының инновациялық қызметі таныстырылды. Мұнда қарапайым телефон байланысынан бастап цифрлы телевизия мен кең жолақты интернет нарығындағы соңғы ұсыныстарға дейін әртүрлі қызмет ұсынылады. «Деректерді өңдеу орталығы» инновациялық жобасы 2013 жылы жұмысын бастаған болатын. Бұл – Орталық Азиядағы Tier III санатындағы, яғни нысанның жұмысын профилактикалық жөндеу кезінде тоқтатпай жүзеге асыруға мүмкіндік беретін сенімді әрі алғашқы жоба. Орталықтың жұмысы туралы Genesis Mining компаниясының жергілікті өкілі Лукас Пфайффер айтып берді.
Мамандар резерві дайындалуда
Б.Сағынтаев облыстық түсті металлургия колледжінде мамандардың дайындығын тексеріп, индустрияландырудың жаңа моделіне мамандарды дайындау жөнінде жиналыс өткізді. Павлодар ірі индустриялық орталық болғандықтан, жоғары кәсіби мамандарға ерекше мұқтаж. Облыстық білім беру басқармасының басшысы Д.Болатханұлының айтуынша, 2017 жылдан бастап металлургия мамандарын дайындауға арналған арнайы бағдарлама жүзеге асырылуда. Мысалы, Алюминий зауыты базасында жақсы нәтиже көрсетіп жүрген жұмыскерлер арасынан болашақ басшылар дайындалады. Премьер-Министр зертхана мен оқу сыныптарын аралап, техникалық-өндірістік базамен, студенттер үйінің тыныс-тіршілігімен де танысты.
Павлодар облысының әкімі Б.Бақауовтың айтуынша, көпсалалы индустриялық кешенде келешекте 14 ірі инвестициялық жобаны іске асыру жоспарланған, бұл 4 мыңнан астам жаңа жұмыс орнын құруға мүмкіндік береді. Облыстың 45 колледжінде 46 мамандық бойынша қосарлы білім беру жүйесі іске қосылған. Облыстың кәсіпорындарымен ынтымақтастық туралы келісімшарттарға қол қойылып жатыр.
Сондай-ақ Премьер-Министр облыстық Оқушылар сарайында білім беру саласын цифрландыру барысымен танысты. Тақырыптық кабинеттерді тексеру барысында Оқушылар сарайының директоры А.Ерубаева мекеменің жұмысы, оны техникалық жарақтандыру және ІТ-сыныптардың мүмкіндіктері туралы айтып берді. Сонымен қатар Б.Сағынтаев медициналық жедел жәрдем стансасына барды. Өңірдегі денсаулық сақтау саласының цифрландыру барысымен танысып, жедел жәрдем бригадаларының жұмысын үйлестіруге көмектесетін медициналық құрылғыларды қарады. Бүгінде медицина ұйымына 12 жоба енгізілген. Оның ішінде басқару мен жұмыс орнының автоматтандырылған жүйесі, электронды медициналық карта, навигациялық жүйе, науқасқа тезірек жету үшін бригадаларды барлау, ЭКГ-ны қашықтан өту сынды жаңашылдықтар бар. Арнайы телемедицина мен интерактивті оқу орталығы жұмыс істейді. Мекеме сегіз ай ішінде 177 мың шақыртуға шыққан.
Бұдан кейін Б.Сағынтаев облыстың медицина саласы қызметкерлерімен көрсетілетін қызметтің сапасын арттыру жайында кеңес өткізді. Әсіресе дәрімен қамтамасыз ету, оның бағасы мен медицина инфрақұрылымы және мамандар біліктілігі қызу талқыланды, ана мен бала денсаулығын қорғау тақырыбына көңіл бөлінді. Айталық, Павлодар қаласының №5 емханасының дәрігері А.Низамутдинова медицина қызметкерлерінің еңбекақы мәселесін көтерсе, жедел жәрдем стансасының дәрігері А.Ермек трассалық медициналық-құтқару пунктілерінің жұмысы туралы айтты. Сирек кездесетін аурулар кезінде дәрі-дәрмектермен қамтамасыз ету мәселесін Павлодар облыстық кардио орталығының кардиологы Г.Мұқанова қозғады. Кездесудің қорытындысы бойынша Б.Сағынтаев Денсаулық сақтау министрі Е.Біртановқа және облыс әкімі Б.Бақауовқа медицина қызметкерлерінің біліктілігін жоғарылату және ұсынылатын медициналық қызметтердің сапасын арттыру бойынша бірқатар шаралар кешенін әзірлеуді тапсырды.
Ал «Атамекен» кәсіпкерлер палатасының өңірлік кеңесінің мүшелерімен кездесу барысында облыста бизнесті дамыту, инвестициялар тарту және отандық өнімдер мен қызметтердің экспортқа бағдарлануын жетілдіру мәселелері қаралды. Кәсіпкерлер өзекті мәселелерді қозғап, өңірде бизнес жүргізуге тосқауыл болатын әкімшілік кедергілерді одан әрі төмендетуге қатысты шаралар ұсынды. Мәселен, «Railways systems KZ» ЖШС бас директоры А.Хачатурян қызметтер мен тауарлар ақысын төлеу жүйесін жетілдіру мәселелері туралы айтса, «Forwoll Group» КТ директорлар кеңесінің төрағасы В.Литуев арнайы экономикалық аймақ аумағында салық режімін жетілдіру туралы ұсыныс білдірді. «Қазэнергокабель» АҚ құрылтайшысы В.Бобров өнеркәсіптік кәсіпорындарға қолдау көрсету шараларын кеңейтуді сұрады. «Галицкое» ЖШС ауыл шаруашылығы кәсіпорнының директоры А.Касицын ветеринарлық қауіпсіздік мәселелерін қозғады. Еуропа қайта құру және даму банкінің басшысы А.Прейманис инвестициялық ахуалды жақсарту үшін ШОБ дамыту маңызды екенін атап өтті.
Фарида БЫҚАЙ,
«Егемен Қазақстан»