«Жастар – Отанға!» жастар саяси лагері – 2009 жылдан бері тұрақты өткізіліп келе жатқан игі бастама. Биыл қатарынан оныншы рет өтіп отырған іс-шараға еліміздің әр аймағынан келген 170 белсенді жас қазақстандық қатысуда. Осылайша, «Жас Отан» жастар қанатының І съезінде Елбасының бастамасымен акция ретінде басталған жоба тың идеялар талқыланатын тиімді алаңға айналып отыр. Бүгінде мемлекеттік деңгейде жүзеге асырылып жатқан «Дипломмен – ауылға!», «Жастар кадрлық резерві» сияқты ірі жобалар дәл осы лагерь жұмысының нәтижесінде қолға алынғанын ерекше атап өткен жөн.
Барша қатысушыларды лагерьдің ашылуымен құттықтаған Мәулен Әшімбаев жастар ісіне қатысты партия тарапынан атқарылған жұмыстарға тоқталды.
– Қазіргі таңда «Нұр Отан» партиясы Елбасы тапсырмасына сәйкес партия қызметін жаңғырту жұмыстарын қарқынды жүргізуде. Осы мақсатта 20-дан астам жаңа жоба қолға алынды. Олардың қатарында жастар саясатын жандандыруға қатысты тың бастамалар да бар. Өйткені жастар мәселесі – партия жұмысындағы басым бағыттардың бірі. Партияның бастамасымен жастардың бағдарламалау негіздерін, робот техникаларын және 3D модельдеуді үйренуі үшін тегін «1000 ІТ-сынып» ашу жобасы жүзеге асырылуда. Одан бөлек, жас буынның дұрыс тамақтануы мен саламатты өмір салтын ұстануын қамтамасыз ету үшін мектеп асханаларын жаңғырту және мектеп спорт алаңдарын қайта жабдықтау жұмыстарын бастап кеттік. Ауыл жастарына ағылшын тілін үйретіп, отандық кітапханаларды заманауи білім орталығы ретінде қайта құру бастамалары да партия тарапынан іске асырылуда, – деді «Нұр Отан» партиясы Төрағасының бірінші орынбасары.
Бүгінде еліміздің бірқатар кітапханаларында аталған кворкинг-орталықтар ашылды. «Жас Отан» жастар қанатының ұйымдастыруымен мұндай орталықтарда «Made in QZ» ұлттық музыка кеші, «Жеті жарғы» шешендік өнер курстары, «Қолғанат» еріктілер мектебі сияқты жастарға арналған комьюнитилер өткізу ісі қолға алынған. Қазірдің өзінде Ақмола, Шығыс Қазақстан, Павлодар облыстары мен Алматы және Шымкент қалаларындағы жаңғыртылған кітапханаларда балаларға арналған «English for kids» және ересектерге шет тілдерін үйрететін «Speaking club» клубтары жұмыс істеп тұр.
Шілде айында «Жас Отанның» жаңа сайтында «J-Library» электронды кітапханасы іске қосылды. Қазір ондағы кітап қоры 650-ге жетті. Жуырда осы электронды кітапхананың интернетсіз, яғни оффлайн режімде оқуға мүмкіндік беретін мобильді қосымшасы іске қосылады. Одан бөлек, «Жас Отан» жастар қанаты «Таза мекен» жобасы бойынша ел аумағындағы 28 киелі мекенде тазалау жұмыстарын жүргізіп, экскурсиялар ұйымдастырды. Ауылдық жерлерде жастар арасында шағын кәсіпкерлікті дамытуға арналған «Жастар – ауылға» жобасы қолға алынған.
М.Әшімбаев осындай тың жобаларды табысты жүзеге асыру үшін еліміздің барлық жастарын белсенділік танытуға шақырды. Сондай-ақ ол бұл жұмыстар Елбасы айқындап берген міндеттерді орындауға бағытталғанын айтып, осы жолда жасотандықтардың алдында тұрған басты міндеттерді атап көрсетті.
– Ел жастарының бойында ұдайы ізденіс, ашық сана, асқақ арман және ұлттық мүдде болуы тиіс. Бұл – бүгінгі заман талабы. Сондықтан ізденуден, оқудан, үйренуден жалықпау керек. Сондай-ақ барлық мәселеде біржақты болмай, балама пікірлерді де ескерген жөн. Дұрыс армандап, нақты мақсаттар қоя білу керек. Ең бастысы, барлық істе ұлттың, елдің мүддесін жоғары қойып, халықтың қамы үшін еңбек етуіміз керек, – деді М.Әшімбаев.
Іс-шара барысында жастар қоғамдағы өзекті мәселелерге қатысты пікірлерін білдіріп, спикерге өз сауалдарын қойды. Ал лагерь жұмысы 19 қыркүйекке дейін жалғасады. Биылғы лагерьдің ең басты жаңалығы Қазақстан жастарының «Ұлттық патриоттық актіге» қол қоюы болып отыр. Бұл құжатқа «Жас Отан» жастар қанатымен бірге Қоғамдық даму министрлігі Жастар және отбасы ісі жөніндегі комитеті, «Қазақстанның жастар конгресі», «Халықаралық «Болашақ» стипендиясы стипендиаттарының қауымдастығы», «Қазақстан студенттерінің альянсы», «Жасыл ел» жастар еңбек жасақтарының республикалық штабы, Қазақстан халқы Ассамблеясының «Жаңғыру жолы» республикалық жастар қозғалысы сияқты бірқатар жастар ұйымдары қол қойды.
Байқал БАЙӘДІЛ,
«Егемен Қазақстан»
Ақмола облысы
