Іс жүзінде біздің ел түркиялық инвесторлардың көптеп келуіне мүдделі. Мәселен, қазір Қазақстанның экспорт көлемі ұлғайып келеді. Түркияға 2017 жылы 1 млрд 145 млн АҚШ долларының өнімі экспортталды.
Егер импортты қарайтын болсақ, 130 млн АҚШ долларының шамасында болса да, Түркиядан тасығанымыз шикізаттық емес өнімдер емес. Оның ішінде машина жабдықтары, құралдар мен құрылғылар, матаның үлесі басым. Енді Қазақстанның алдында экспорттағы шикізаттың үлесін азайтып, өңделген өнімді сату міндеті тұр.
Осыған орай, Мемлекет басшысының ресми сапары кезінде көптеген салада ынтымақтастықты тереңдете түсу ұсынылды. Қазір байыптап қарайтын болсақ, Түркияда өңдеу өнеркәсібі жақсы дамыған. Әлемдік деңгейде жеңіл өнеркәсіптің, қайта өңдеу өнеркәсібінің дамуы бойынша Қытай алдыңғы орында тұрса, Түркия содан кейінгі орындарда орналасқан.
Міне, Мемлекет басшысы осы мәселелерге назар аударып, Түркия кәсіпкерлерін Қазақстанға инвестиция салуға шақырды. Оның ішінде қайта өңдеу саласына маңыз берілуде. Өйткені, елімізде 2017 жылы қабылданған Экспорттық стратегия бойынша 2022 жылға дейін шикізат экспортынан біртіндеп арылып, өңделген өнім экспортын ұлғайту міндеті қойылды. Осы межеден шығу үшін бізге Түркияның көмегі қажет.
Мадияр КЕНЖЕБОЛАТ,
экономика ғылымдарының кандидаты