Бүгінде түрік инвесторлары тау-кен, энергетика салаларына да қызығушылық танытуда. Мәселен, «Lidya Madencilik» атты түрік компаниясы Қарағанды облысындағы Оңтүстік Мойынты алтын кен орнының 100% үлесін сатып алуды жоспарлап отыр.
Сондай-ақ екі ел сауда айналымын қазіргі 2 млрд доллардан 5 млрд долларға дейін көбейтуге келісті. Бүгінде Қазақстан Түркиядан тауарлардың үлкен ассортиментін импорттайды, соның ішінде халық тұтынатын тауарлар (киім, аяқ-киім), құрылыс материалдары, химия өнеркәсібінің өнімдерінің үлесі басым. Түркия үшін Қазақстан ең алдымен құрылыс саласында қызмет көрсету нарығы ретінде тартымды. Қазақстанда Sembol, ENKA сияқты түрік компанияларының филиалдары табысты жұмыс істеуде. Түркияның Sembol Construction компаниясының филиалы 2017 жылы еліміздің бюджетін 17,27 млрд теңгеге толтырып, құрылыс компанияларының ішінде ең үлкен салық түсімдерін қамтамасыз етті.
Қазақстан үшін экспортының құрылымында 41%-і тұтынушылық, 47% аралық және 11% инвестициялық тауарды құрайтын Түркияның тәжірибесі өте пайдалы. Өз капиталымен және технологияларымен келетін түрік кәсіпкерлері Қазақстан өңірлерінің әр түрлі салаларын дамытуға елеулі үлес қосуға қабілетті.
Айжан МҰҚЫШБАЕВА,
Әлемдік экономика және саясат институтының сарапшысы