Сонымен қатар Құндызды ауылында «Күлдір де күлдір кісінетіп, Күреңді мінер ме екенбіз. Күдеріден бау тағып, Ақ кіреуке киер ме екенбіз» деп жырлаған батыр, қолбасшы Ақтамберді жыраудың кеуде мүсіні орнатылды. Тұғырын қоса алғанда 4 метрге жуықтайтын ескерткіштің авторы – жас мүсінші Нұрбол Қалиев.
Абай ауданының əкімі Жарқынбек Байсабыров биыл «Рухани жаңғыру» бағдарламасы аясында 75 миллион теңгеге жуық демеушілік көмек көрсетілгенін айтады. Ал Құндыздыда бой көтерген спорт нысаны мен жыраудың бюстіне 16 миллион теңгеден астам қаражат жұмсалыпты. «Қайда жүрсек те туған жердің туын биік ұстауға тырысамыз. Ұлылар елінің тумасы екенімді әркез мақтан етемін. Спорт кешенінің салынуына жергілікті кәсіпкерлер де қолұшын созды, батырдың кеуде мүсінінің қойылуына Ақтамберді бабамыздың ұрпақтары, Дәулет Тұрлыханов ағамыз да қолдау көрсетті. Бұл ауылдан əлі де талай чемпиондар шығатынына бек сенімдімін», дейді Айбек Нұғымаров.
Азамат ҚАСЫМ,
«Егемен Қазақстан»
Шығыс Қазақстан облысы,
Абай ауданы,
Құндызды ауылы