Еуразиялық экономикалық одақ мәселелері жөніндегі өкілетті өкіл Ақмарал Қабденованың айтуынша, дәрілік заттардың уақтылы және сапалы сараптамасы қауіпсіз, тиімді және сапалы дәрі-дәрмектермен қамтамасыз етудің негізі болып табылады.
Қазақстанның мемлекеттік фармакопеясының талаптарына сәйкес келмейтін дәрі-дәрмектерді нарыққа жібермеу барысынан жайынан хабардар еткен Сынақ орталығының директоры Татьяна Абрамова зертханаларда физикалық-химиялық, иммунобиологиялық, токсикологиялық, микробиологиялық және басқа да сынақтар өткізілетіндігін атап өтті.
Бүгінде аталған Орталықта дәрілік препараттардың сапасы мен қауіпсіздігін бақылауға арналған 1000-нан астам бірлік құрал-жабдық бар. Зертханалардың орналасуы мен жұмыс аймақтары халықаралық стандарттарға сәйкес жабдықталған әрі еуропалық үлгіден кем түспейді.
2015 жылы Сынақ орталығына дәрілік препараттардың физикалық-химиялық сынақтары бойынша EDQM/MJA-093 (European Directorate for the Quality of Medicine) аккредитациялық аттестаты берілген. Ал 2018 жылғы шілдеде Орталық медициналық мақсаттағы бұйымдардың физикалық-химиялық сынақтары және дәрілік препараттар мен медициналық мақсаттағы бұйымдардың биологиялық сынақтары тұрғысынан аккредитациялау саласын кеңейту және қолданылатын аттестатты растау мақсатында EDQM тарапынан жүргізілген аудиттен өткен. Орталық OMCL дәрілік препараттардың сапасын бақылау жөніндегі ресми зертханалардың Жалпы еуропалық желісінің (GEON) мүшесі болып табылатындығы ISO/IEC 17025 халықаралық стандарты және EDQM директиваларының талаптарына сәйкестігінің айғағы.
Эльвира Серікқызы,
«Егемен қазақстан»
АЛМАТЫ
