Еліміздің атынан өнер көрсеткен шулық өнерпаздарды Түркия жеріне Шу ауданы әкімінің орынбасары Клара Қожағаппанова, Жамбыл облыстық мәдениет, архивтер және құжаттама басқармасының бас маманы Еркежан Сембаева, облыстық халық шығармашылығы орталығының көркемдік жетекшісі Эльмира Дүтбаева және Қазақстанның еңбек сіңірген қайраткері Әуесхан Келгенбаев бастап барған болатын.
Өнер мерекесінің алдында жамбылдық делегация Этимесгут ауданының мэрі Энвер Демирельдің қабылдауында болып, әулиеаталық шеберлердің қолынан шыққан Жамбыл Жабаевтың бейнесі салынған кілемшені сыйға тартты. Он күнге созылған дәстүрлі фестиваль аясында бірқатар түркі тілдес мемлекеттер мен Түркияның өнер жұлдыздарымен қатар, жамбылдықтар да көрермендерді риза еткен. Шара барысында Шу ауданынан барған өнерпаздар «Жан еркем», «Ауылың сенің іргелі» сияқты халық әндерімен қатар, Майлықожаның «Өсиет» термесін, Әбдімомын Желдібаевтың «Еркесылқым» күйін орындап, Ескендір Хасанғалиевтің «Атамекен», Мэлс Өзбековтің «Толқиды Шуым» әндерін шырқады. Ал Анкара төрінде қазақ өнерін әйгілеген «Әсем әуен» фольклорлық ансамблін түріктің «Бенгү» арнасының тікелей эфирден көрсетуі де атап өтуге тұрарлық жетістік. Сонымен қатар Энвер Демирельдің келесі жылы Түркияда күйші Әбдімомын Желдібаевтың шығармашылық кешін өткізу туралы ұсынысы да қазақ мәдениетіне көрсетілген құрмет. Ал дәстүрлі фестиваль соңында еліміздің Түркиядағы Төтенше және өкілетті елшісі Абзал Сапарбекұлы әулиеаталық өнерпаздарға алғысын білдірді. Бұдан кейін жамбылдықтар Нигде қаласында да өнер көрсетті.
Шу ауданы әкімінің орынбасары Клара Қожағаппанованың айтуынша, Түркияның Нигде қаласының Алтай деген ауылында кілең қазақ ұлты өкілдері тұрады екен. Алтайлықтар да Жамбыл өңірінен барған бауырларын құрметпен қарсы алып, қандастар өнерін тамашалау үшін қалаға арнайы келіпті. Айта кетейік, он бес жыл бұрын бастау алған дәстүрлі фестивальға өңірімізден өткен жылы Т.Рысқұлов ауданының өнерпаздары қатысып қайтқан болатын.
Хамит ЕСАМАН,
«Егемен Қазақстан»
Жамбыл облысы
