Шараны БҰҰ моделінің үйлестіру орталығы Қазақстан Республикасының Тұңғыш Президенті-Елбасы Кітапханасы мен Қоры біріге отырып, «Ұлан-ғайыр дала елі» қоғамдық бірлестігінің жұмысы аясында ұйымдастырды.
Орталық Азиядағы БҰҰ-ның І халықаралық моделі – БҰҰ шеңберінде жаһандық идеяларды талқылау режімінде өткізілетін халықаралық сұхбат алаңы, онда жоғары оқу орны студенттері мен мектеп оқушылары БҰҰ органдарының жұмысын жаңғыртады. Әрбір отырыстың мақсаты – белгіленген мәселелерді талқылау, сонымен бірге әрбір комитеттің құзыретіне қарар дайындау. Бұл қарарлар БҰҰ-ның мамандандырылған агенттігіне жіберіледі.
Конференция жұмысының күн тәртібіне «Қазақстан және БҰҰ: 25 жылдық әріптестік және табысты ынтымақтастық – жаһандық бейбітшілік, тұрақтылық және орнықты даму үшін Қазақстан Республикасының бейбіт бастамалары» тақырыбы таңдалып алынды.
Халықаралық мәселелерді талқылауға елімізден, Әзербайжан, Үндістан, Бангладеш, Қырғызстан, Ресей, Пәкістан, Ауғанстан, Сербия, Өзбекстан елдерінен 200-ден астам делегат пен бақылаушы қатысты. Олар балалар еңбегі, киберқауіпсіздік, босқындар құқығы, ядролық қару қолдануды шектеу, діни төзбеушілік, гендерлік теңдік және экологиялық таза қалалар санының артуы сияқты мәселелер төңірегінде пікір алмасты.
Венера ТҮГЕЛБАЙ,
«Егемен Қазақстан»