– Данэлия, жеңіске жетуіңмен құттықтаймыз. «Junior Eurovision – 2018» ұлттық іріктеу кезеңіне дайындық өте қысқа мерзімде өткені белгілі. Өзің дайындық барысын қалай өткіздің?
– Әрине, уақыт өте тығыз болды. Оқу жылы да басталып кетті. Мектептен ұзақ уақытқа қол үзіп қала алмайтындығым анық еді. Бірақ тым қысқа мерзімге қарамастан, сабағыма да, ән айтуға да үлгердім. Финалға шыққан басқа да балалар осындай уақыттың тығыздығын сезіне отырып дайындалды. Менімен бірге іріктеу кезеңіне қатысқан балалардың барлығы талантты. Аз ғана уақыттың ішінде бір-бірімізге бауыр басып, өте жақын достардай болып кеттік.
– Данэлия, осыған дейін де әуезі жағынан, мәтіні тұрғысынан да күрделі әндерді таңдап жүрсің. Бұл жолы да солай болды. Неліктен «Өзіңе сен!» әнін таңдадың?
– Бұл ән менің жан дүниеме өте жақын сезілді. Ішкі рухани әлеміммен үйлесім тапқан әнді қандай күрделі болсын, мен жеңіл орындап шықтым. Әрине, көрерменнің алдына шыққанда қатты толқығаным рас. Ал «Өзіңе сен!» әні кез келген жасөспірімнің бойында болатын сенімсіздік әрекеттерді жеңіп, қандай да бір күш-қуат беретіні сөзсіз. Ал ондай кезде сенімділік те айқын, арманыңа да нық қадам басасың. Әнді жазу барысында менің пікірім, ойларым, ұсыныстарым назарға алынды.
– Білуімше, әннің сөзін Камилла Даирова, әуезін Иван Лопухов жазды емес пе? Осындай шығармашыл жандарды қалай кездестірдің?
– Қазақ тіліндегі мәтіннің авторы Камилла Даировамен ұстазым арқылы таныссам, ал ағылшын тіліндегі мәтінді жазған Артем Кузьменков және композитор Иван Лопухпен Украинда «Голос.Дiти» байқауында танысқан едім. Авторлар маған шабыт беріп, ерекше бір шығармашылық сәттер сыйлады.
– Әнді айтуға қанша уақыт дайындалдың?
– Ұстазым, Наталия Чураковамен екі апта бойы тынымсыз дайындықта болдық. Әрине, әнді меңгеру оңай болған жоқ, дегенмен тыңдармандарға ұнады деп ойлаймын.
– Данэлия ән өнеріне деген құштарлық сенің бойыңда қалай пайда болды?
– Отбасында әкем фортепианода ойнайды, ал мен ол орындаған әндерді ұйып тыңдаймын.Үш жасымнан ән айтқанды ұнаттым десем де болады. Үйде інім және сіңліммен шағын концерттер ұйымдастыратынбыз.
– Енді, міне, кішкентай Данэлия үлкен байқаулардың жеңімпазы болып жүр. Алда қандай жоспарларың бар?
– Менің жоспарым, оқу және ән айту шеберлігімді шыңдай түсу. Мектепті өте жақсы бағаға аяқтасам, әрі қарай уақыт көрсете жатар деп ойлаймын.
– Он жасыңда «Голос. Дiти» байқауына қатысып, ерекше әндеріңді көпшілік ұйып тыңдады. Дмитрий Монатиктің шығармашылық ұжымы да сенің орындауыңа тәнті болды. Қазіргі кезде осы ұжыммен шығармашылық байланыстар бар ма?
– Дима Monatik өз саласының кәсіпқойы. Байқау барысында ол біздермен күніне бірнеше сағат бойы дайындалатын. Мен көп нәрсе үйрендім. Байқаудан кейін концерттерге де бірге шықтық. Ал қазіргі кезде байланысымыз үзілген жоқ, жиі хабарласып тұрамыз.
– Күні кеше өткен іріктеу кезеңінен кейін көрермендер «Данэлия – «Жұлдыз!» деп сенің мәртебеңді көтеріп жатты. «Жұлдыз» ұғымын қалай түсінесің, ол қандай болуы керек?
– Маған сенім артқан тыңдармандарға үлкен рахмет. Ал жұлдыз болу кәсіби тұрғыдан үлкен жауапкершілікті талап етеді. Қарапайымдылық пен еңбекқорлық та қажет. Мен үшін жұлдыздар – Димаш Құдайберген, Дженнифер Лопес, Monatik сияқты еңбекқор жандар.
– Шетелдерге байқауларға барғанда Қазақстан туралы сұраса қалай жауап берер едің?
– Мен Қазақстаныммен мақтанар едім. Елімізде қаншама талантты балалар бар. Олар да әлемге танылса деп армандаймын. Сонымен қатар жер жүзіндегі ең көрікті қала – Алматыны мақтан етер едім!
– Әңгімеңе рақмет. Сенен зор үміт күтеміз. Халықаралық байқаудан тек жеңіспен оралуыңа тілектеспін.
Эльвира СЕРІКҚЫЗЫ,
«Егемен Қазақстан»