Сондай-ақ партия қызметін жаңғырту аясында қолға алынған жаңа жобалардың аймақта жүзеге асырылу барысымен танысып, партияның облыстық активімен жиын өткізді. Одан бөлек, «Рухани жаңғыру» бағдарламасы бойынша өңірлік жобалау кеңсесінде болды және облыс әкімі, партия облыстық филиалының төрағасы Архимед Мұхамбетовпен бірге «7 – 20 – 25» бағдарламасы бойынша баспаналы болған жергілікті тұрғындарға пәтер кілтін тапсырды.
Елбасының Саяси партия кеңесінің кеңейтілген отырысында берген тапсырмасы бойынша соңғы айларда партия қызметін жаңғырту жұмыстары қарқын алып, бірқатар тың жобалар, жаңа бастамалар қолға алынғаны белгілі. Соның ішінде бастауыш партия ұйымдарының рөлін күшейту ісі де бар. Бүгінде еліміз бойынша «Нұр Отанның»
6 мыңға жуық бастауыш партия ұйымы бар. 1 миллионнан астам нұротандық осы ұйымдарға топтастырылған. Биыл аталған ұйымдардың жұмысын жандандыру мақсатында партия тарихында алғаш рет еліміздің төрт аймағында арнайы форумдар өткізілді. Онда қатысушылар БПҰ қызметтерін одан әрі жандандыруға бағытталған тұжырымдамаға енгізу үшін өз ұсыныстары мен пікірлерін білдірді. Ең ірі және белсенді бастауыш партия ұйымдарының мүшелері қараша айында Астанада өтетін республикалық форумға қатыспақ.
М.Әшімбаев партияның «Соколов-Сарыбай тау-кен байыту өндірістік бірлестігі» АҚ аудандық филиалына қарасты бастауыш партия ұйымдарының басшылығымен кездесуінде осы мәселелерге ерекше назар аударды. Аталған филиал 2007 жылдың сәуір айында құрылған. Бүгінде ол мүшелерінің саны жағынан Қостанай облысында ең ірі филиал болып саналады. Мұнда қазіргі кезде 20 мыңнан астам партия мүшесі және 31 бастауыш партия ұйымы бар. М.Әшімбаев кездесуде бастауыш партия ұйымдары жергілікті жерлердегі барлық партиялық жұмыстың негізгі орталығы болуы керектігін айтты.
– Партиялық жаңғыру аясындағы басым бағыттарымыздың бірі – бастауыш партия ұйымдарын жандандырып, олардың жұмыс тиімділігін арттыру. Соған орай Павлодар, Шымкент, Қарағанды және Ақтөбе қалаларында аталған ұйымдардың аймақтық форумдарын өткіздік. Онда ұйым өкілдері партиялық жаңғыруға қатысты өз ойларын айтып, түрлі ұсыныстарын жолдады. Оның барлығы алдағы қараша айында Астанада өтетін республикалық форумда кеңінен талқыланып, пысықталады, – деді М.Әшімбаев.
Сонымен қатар партия Төрағасының бірінші орынбасары аталған филиалдың жұмысына ризашылығын білдіріп, алдағы міндеттерге де назар аударды.
– Елбасының тапсырмасы бойынша біз партия қызметін жаңғырту арқылы еліміздің заманауи, тиімді, жоғары технологиялы саяси ұйымы ретінде қалыптасуымыз керек. Бүкіл әлем өзгерістерге ұшыраған кезеңде біз де қазіргі заманның үрдістеріне бейімделуге тиіспіз. Жақтастарымызға өз идеяларымызды түсіндіруде жаңа тәсілдерді қолданып, озық халықаралық тәжірибелерді ескеруіміз қажет. Сол арқылы Елбасының сенімді саяси тірегі және еліміздің жетекші саяси күші болып қалуымыз керек, – деді М.Әшімбаев.
Елбасы Саяси кеңес отырысында «Рухани жаңғыру» бағдарламасы «Нұр Отанның» идеологиялық платформасы болуы керектігін айтқан болатын. Сондықтан аталған бағдарламаның партия үшін маңызы жоғары. Осыған орай М.Әшімбаев Қостанай облысындағы «Рухани жаңғыру» бағдарламасын жүзеге асыру жөніндегі өңірлік жобалық кеңсесінің жұмысымен арнайы танысты.
Жалпы облыста аталған бағдарлама аясында ауқымды жұмыстар атқарылғанын аңғару қиын емес. Соның ішінде «Туған жер» жобасы бойынша орнатылып, Қостанай қаласының рухын асқақтатып тұрған Шақшақ Жәнібек батырдың ескерткішін ерекше атап өтуге болады.
Бұдан соң М.Әшімбаев Елбасының бес бастамасы аясында өңірде атқарылып жатқан жұмыстармен танысу үшін Қостанай мемлекеттік педагогикалық университетіне барды. Оқу ордасының ректоры Еркін Әбілдің сөзіне қарағанда, бүгінде жоғары оқу орнында 2 804 студент білім алады. Университеттің 465 орындық 5 қабатты бір ғана жатақханасы бар. Дегенмен, тағы 344 орын қажет. Осы мәселені шешу үшін Елбасының бес әлеуметтік бастамасы аясында үш қабатты, әрқайсысы 86 орындық 4 ғимараттан тұратын кампус салу жоспарланып отыр.
Бес әлеуметтік бастама аясындағы «7 – 20 – 25» бағдарламасы да Қостанай облысында табысты жүзеге асырылуда. Қазірдің өзінде бірқатар қостанайлықтар осы бастаманың нәтижесінде тұрғын үйге қол жеткізіп, баспаналы болуда. Атап айтқанда, жаңадан бой көтерген «Алтын арман» шағын ауданындағы бірнеше көп қабатты үй «7 – 20 – 25» бағдарламасы бойынша берілуде. М.Әшімбаев осындай қуанышқа кенелген пәтер иелерін құттықтап, салтанатты кілт тапсыру рәсіміне қатысты.
«Нұр Отан» партиясы Төрағасының бірінші орынбасары облысқа сапары барысында партиялық жобалардың жүзеге асырылу жайымен де танысты. Атап айтқанда, ол партияның IT-мамандар даярлау үшін «20 ІТ-орталық» және балаларға арналған тегін «1000 IT-сынып» ашу жобаларын жүзеге асыруда көпке үлгі болып отырған мамандандырылған «Озат» лицейінде, сондай-ақ Рудный қаласындағы №2 гимназияда болды.
Сонымен қатар партияның облыстық активімен кездесті.
Нәзира ЖӘРІМБЕТ,
«Егемен Қазақстан»
Қостанай облысы
