Іс-шараға Ұлттық экономика және Ауыл шаруашылығы министрліктерінің, «Бәйтерек» ҰБХ» АҚ, «Самұрық-Қазына» ҰӘҚ» АҚ, «Kazakh Invest» АҚ, «Атамекен» Ұлттық кәсіпкерлер палатасы, Назарбаев Университет, «Астана» халықаралық қаржы орталығының ресми өкілдері, мемлекеттік сауда ұйымдарының және екі елдің ірі компанияларының басшылары қатысты.
Отырыс барысында Кеңеске қатысушылар Қазақстанда бизнес жүргізу мүмкіндіктері туралы тәжірибелерімен және ойларымен бөлісті. Сонымен бірге Қазақстанның бизнесті қолдауға, инвестицияларды қорғауға, отандық және шетелдік компаниялардың тең жағдайларын қамтамасыз етуге арналған қаржы құралдарын жетілдіруге бағытталған саясатына ерекше назар аударылды.
Кездесу барысында Қазақстан тарапынан Іскерлік кеңестің тең төрағасы, «Бәйтерек» ҰБХ» АҚ Басқарма төрағасы Айдар Әріпханов атап өткендей, «Қазақстан-Испания» Іскерлік кеңесі шеңберіндегі келіссөздерге 40-тан астам испаниялық және 60 қазақстандық компания қатысты.
– Қазақстан нарығында көптен бері жұмыс істеп келе жатқан бірқатар испаниялық компаниялар бар. Біздің міндетіміз – Қазақстанға жаңа компаниялар тарту және сауда саласындағы ынтымақтастықты нығайту. Сонымен қатар бірлескен кәсіпорындар құру және бірлескен жобаларды, әсіресе мемлекет-жекеменшік әріптестігіне қатысты жобаларды жүзеге асыру болып табылады, деді Іскерлік кеңестің 5-ші отырысында Қазақстан-Испания үкіметаралық комиссиясының тең төрағасы, Испанияның сауда жөніндегі мемлекеттік хатшысы Ксиана Мендес.
Іскерлік кеңес барысында «Бәйтерек» холдингі екі меморандумға қол қойды. Оның біріншісі Испания Корольдігінің Сауда жөніндегі мемлекеттік хатшылығымен индустриалдық және инфрақұрылымдық жобаларды қолдау, іске асыру және бірлесіп инвестициялау саласындағы ынтымақтастыққа бағытталған. Екінші меморандум, испаниялық компания тарапынан инфрақұрылым, телекоммуникация, туризм, агроөнеркәсіп және «жасыл энергетика» салаларындағы экспорттық шаралар ынтымақтастығына бағытталған COFIDES-ті дамытуды қаржыландыру болып табылады.
Сонымен қатар форум шеңберінде «Kazakhstan Project Preparation Fund» ЖШС («Бәйтерек» холдингінің еншілес ұйымы») және «Э-Жасыл» ЖШС Қазақстан аумағындағы қоқыс өңдейтін зауыттар құрылысы саласындағы испаниялық тараппен ынтымақтастыққа бағытталған Өзара түсіністік туралы меморандумға қол қойылды. Осы меморандум аясында еліміздің аумағында жалпы құны 150 миллион еуро болатын қоқыс өңдейтін 9 нысан салынбақ.
Жылқыбай ЖАҒЫПАРҰЛЫ,
«Егемен Қазақстан»
