Биылғы жиынға Ұлттық музейден 15 маман арнайы шақырылып, апта бойы көрші елдің тарихи-мәдени мұраларымен танысты. Одан бөлек, семинар барысында Қытай музейлері туралы жалпы мағлұмат беріліп, ондағы мұражайлардың халықаралық деңгейдегі қызметі туралы дәрістер тыңдалды.
ҚХР Мәдениет министрлігі Орталық кадрлар академиясы Партия комитетінің хатшысы Дуань Чжоуъу қазақстандық делегацияны қабылдау кезінде Қытай тарапы «Бір белдеу, бір жол» стратегиялық бағдарламасы бойынша Қазақстанды сенімді серіктес санайтындығын, қос ел арасындағы мәдени ынтымақтастықты дамыту басты мақсат екенін атап өтті. Әр елдің тарихын жәдігер арқылы сақтап, ұрпаққа жеткізуде қашанда рөлі айрықша саналатын музей саласына кеңінен тоқталды. «Музей – кешегі өткен тарихымызды баяндап, келешек ұрпаққа жеткізуші қадірлі орын. Соңғы жылдары Қытайдағы музей қызметі қарқынды дамып, жоғары нәтижеге қол жеткізді. Бүгінде олар экспонатты сақтаумен қатар, зерттеу, көрмелер ұйымдастыру және жұртшылық назарына ұсынумен айналысады. Осы бағытта қазақстандық музей мамандарымен тәжірибе алмасып, бұдан әрі де мәдени қарым-қатынасымызды жалғастыра бергіміз келеді», деді.
Қазіргі кезде ҚХР-да жалпы саны 4873 музей бар. Оның ішінде мемлекеттік музей – 4873, жекеменшік музей саны – 1297. Жекеменшіктері жалпы музейлердің 30 пайызын құрайды. Бір ерекшелігі, олардың 80 пайызы халыққа тегін қызмет көрсетеді. Сондықтан да болар, қазақстандық музей қызметкерлері бас сұққан Қытай Ұлттық, Гугун, Маньчжо́у-го «Қуыршақ мемлекеті», Цзилинь, Хэйлунцзян музейлерінің қай-қайсысына да келушілер көп. Орта есеппен жылына музейді тамашалаушылар саны 500-600 млн-ды құрайды екен. Ал бір жылда өткізілетін көрме саны орта есеппен – 22 000, ал 2016 жылы ең жоғарғы көрсеткіш бойынша көрме саны 30 мыңға жеткен. Қытай музейлерінде сақталып тұрған экспонаттар саны шамамен – 306 млн. Ал кейінгі кездері жылдан-жылға дамып келе жатқан музей саласы бойынша ЖОО-да жаңа мамандықтар ашылған. 2016 жылғы көрсеткіш бойынша 47 университетте бакалавриат, 34 университетте магистратура негізінде мамандар даярлануда.
Аталған іссапар барысында Ұлттық музей мамандары шетелдік музейлер ісін танып, көп мағлұмат алып қайтты. Қазақстанға арнайы келетін саяхатшылардың елдің тарихына, мәдениетіне, салт-дәстүріне деген қызығушылығын арттыру үшін бұл саладағы қызметкерлерге әлемдік деңгейдегі тәжірибе артықтық етпейді.
Ләйлә НОҒАЙБЕКҚЫЗЫ,
Ұлттық музейдің қызметкері