Дін жолындағы адасушылық – қай қоғамның болсын жан ауыртар қайғысы. Дүйім елді дүрліктірген, бірнеше адамның өмірін қиып, 40-қа жуық жергілікті тұрғынды жаралаған қанды оқиға – 2016 жылы 5 маусымда болған Ақтөбедегі терактіні негізге алған деректі туынды авторлары мұрағат материалдарына, жапа шеккендердің туыстарының, лаңкестіктен аман қалған жандардың естелігіне сүйенген.
«Қазылар алқасы үш фильмді үздік деп атады, оның ішінде біздің де фильміміз бар. Фестивальдың бас жүлдесі ресейлік «Форсаж» фильміне бұйырды. «Сенім жолында» фильмін көрермен жақсы қабылдады. Тіпті кейбіреулері осындай жағдайлардың (діни экстремизм мен терроризм) Қазақстан жерінде орын алғаны туралы естіп таңғалды. Фильм екі жыл бұрын жарық көрген-ді. Фестивальдың ұйымдастырушылары фильмнің үзінділерін ғаламтордан көріп, маған хабарласты. Сол үшін де ұйымдастырушыларға алғысымды білдіремін», деді режиссер Әсия Байғожина.
«Еуразия.DOC» атты ТМД елдерінің деректі кино фестивалі осымен үшінші рет өткізіліп отыр. Биыл фестивальға қатысуға 23 елден 150 фильм үміт білдірген. Оның ішінен негізгі байқауға 12 елдің 24 деректі фильмі іріктеуден өткен.
Бағашар ТҰРСЫНБАЙҰЛЫ,
«Егемен Қазақстан»
