Нақты мәселелерге тоқталып, жауапты адамдарға тиянақты нұсқаулар берілді. Бұрынғы белгіленген «Нұрлы жол», «Нұрлы жер», «Рухани жаңғыру» сынды сүбелі, күрделі, үлкен жобалардың әрі қарай жүйелі жалғасын тауып, сапалы орындалуына да министрлер мен облыс әкімдерін жұмыла жұмыс істеуге шақырды. Бұл – өте құптарлық бастама. Соның ішінде, әсіресе, Елбасының халықтың баспанамен қамтылуына, ауылды жерлерді көркейтуге, ұстаздар қауымының кәсіби мәртебесін көтеру мен жастарға сапалы білім беру, сондай-ақ мемлекет қаржысын ақылмен жұмсап, үнемді пайдалануға қатысты айтқан ұсыныстары көпшіліктің көкейінде жүрген арман-мұратын бір арнада тоғыстырған көреген шешім болды деп есептеймін.
Жолдауда айтылған мәселенің әрқайсысы жеке-жеке талдап, тоқталуға және сол айтылған мәселелер бойынша жүйелі жұмыстар атқаруға сұранып тұр. Одан кейін, әрине, Жолдауда Қазақстанның халықаралық деңгейдегі беделі туралы да өте жақсы айтылды. Қазақстанды 27 жылдың ішінде жаһан танып, әлем мойындады. Әлемдік аренада алпауыт мемлекеттермен тең дәрежеде иық тірестіріп тұрарлық беделді орынға ие болды. Жалпы, бұл Жолдауда Қазақстан халқының жанына, өміріне керек нәрселердің барлығы сөз болды деп ойлаймын. Енді баршамыздың алдымызда ел болып жұмылып, бұған дейін жасалып келген жұмысты одан әрі жалғастырып, айтылған мәселелердің бәріне жіті мән беру мен жүзеге асыру міндеті күтіп тұр.
Мырзатай ЖОЛДАСБЕКОВ,
мемлекет қайраткері