Тұңғыш Президентіміздің биылғы Қазақстан халқына арнаған Жолдауын Қарағанды қаласындағы №4 емхананың ұжымымен бірге мен де ден қойып тыңдадым. Әлбетте, маған Елбасының денсаулық сақтау саласына қатысты айтқан сөздері айрықша әсер етті. Өз басым мұны медицина қызметкерлеріне көрсетілген қолдау, сонымен бірге артар жауапкершілігі мол қадам деп қабылдадым.
Президент Жолдауда «2019 жылдың 1 қаңтарынан бастап барлық емханалар мен ауруханалар медициналық құжаттарды қағазсыз, цифрлы нұсқада жүргізуге көшуге тиіс. Бұл 2020 жылға қарай бүкіл тұрғындардың электронды денсаулық паспорттарын жасауға, кезектерді, бюрократияны жоюға, қызмет көрсету сапасын арттыруға мүмкіндік береді», деді.
Жалпы, Қарағанды облысында цифрландыру жұмыстары осыдан екі жыл бұрын қанатқақты нұсқа ретінде қолға алына бастағанын мақтанышпен айтқым келеді. Цифрландырудың бір жақсы жері, науқас алдыңызға келгенде, ол туралы деректің барлығы да көз алдыңызда сайрап тұрады. Мұның өзі науқасқа көрсетілер қажетті ем-домды уақытты созып алмай, дер кезінде сапалы түрде жасауға септігін тигізеді. Мысалы, бұрын бір науқасқа дәрігер жарты сағат уақытын жұмсаса, қазір ем-дом көрсетудің уақыты екі есеге қысқарды. Сонымен қатар науқас туралы деректер бір базаға енгізіліп, орталықтандырылған. Мысалы, бізге қаралып жүрген науқас басқа қалада іссапармен жүріп ем қабылдайтын болса, оның егжей-тегжейінен біз орталықтандырылған жүйе арқылы сол заматта хабардар болып отырамыз.
Менің өзім қазіргі уақытта Қарағанды қаласындағы №4 емханада офтальмолог, яғни көз дәрігері болып жұмыс істеймін. Балалар мен ересектерді қатар емдеймін, бұған рұқсат беретін арнайы сертификатым бар. Бүгінгі уақытта біздің емханада бюрократиялық кедергілерді жою, сыбайлас жемқорлықтың алдын алу сияқты маңызды шаралар бойынша жұмыстар белсенді түрде жүргізіліп жатыр. Мәселен, дәрігерлердің бөлмесі дыбыс жазу, бейнетаспаға түсіру құралдарымен жабдықталған. Яғни, науқас пен дәрігер арасындағы әңгіме ашық форматта жүргізіледі. Сонымен қатар сайтымыз тұрақты жұмыс істейді, әлеуметтік желілерді де белсенді түрде қолданамыз. Бәрі де ашық түрде: кез келген науқас дәрігердің қызметіне көңілі толмаса, арыз-шағымын интернет желісі арқылы жоғары жаққа кедергісіз жеткізе алады. Жасыратыны жоқ, мұның өзі біздің жұмысымызға жауапкершілікпен қарап, жинақы жүруімізге, біліктілігімізді үнемі жетілдіріп, қызмет сапасын арттырып отыруымызға өте қатты ықпал етеді.
Негізі, Президент Жолдауындағы 2019 жылдың 1 қаңтарынан бастап медицина қызметкерлерінің еңбекақысын көтеру жөніндегі мәлімдемені қуана қабылдағанымызды жасырмаймыз. Дегенмен, біз үшін алдымызға көмек сұрап келген науқастардың, жалпы тұрғындардың денсаулығы ең бірінші кезекте маңызды екендігін баса айтқым келеді.
Айдос ОМАРОВ,
№4 қалалық емхананың офтальмолог дәрігері
ҚАРАҒАНДЫ