Министр жаңа Жолдаудың әлеуметтік бағыты мен қазақстандықтардың өмір сүру сапасын арттыруға бағытталуының маңызын атап өтті. Сондай-ақ ол мемлекеттік қызметтерді цифрландыру және автоматтандыру ерекше рөл атқаратынын тілге тиек етті. «Бұл мәселе барлық азаматқа қатысты. Мемлекеттік қызметтер белсенді түрде орындалуы тиіс. Біздің алдымызға мемлекеттік қызметтің 90 пайызын электронды форматқа көшіру міндеті қойылды және біз мұны міндетті түрде жүзеге асырамыз», деді Д.Абаев.
Бұл мәселелер барлық салаға тікелей қатысты. Мысалы, 2019 жылы электронды денсаулық төлқұжатын енгізу және құжат айналымын цифрлы жүйеге ауыстыру ұзын-сонар кезек пен қағазбастылықтан құтылуға көмектеседі.
Кездесу барысында өңірлік БАҚ-тың жай-күйі, өзекті мәселелері де назардан тыс қалған жоқ. Аймақтық журналистер министрмен бірге толғандырған мәселелерін, қазақстандық журналистиканың даму перспективаларын талқылады. Шығыс Қазақстан облысы әкімінің орынбасары Әсем Нүсіпованың айтуынша, кездесуге 152-ге жуық аймақтық журналист қатысқан. Оның 123-і баспасөз басылымдарында жұмыс істейді. Сұрақтардың басым бөлігі мерзімді басылымдарда кездесетін қиындықтарға қатысты қойылды.
Ақпарат және коммуникациялар министрі интернет ресурстардың белсенділігіне қарамастан, баспасөздің ғұмыры ұзақ болатынын айтты.
«Зерттеулерге сүйенсек, интернет ресурстардан мақаланы оқуға орта есеппен 40 секунд кетеді, ал газетте осы мақаланы оқу 40 минутқа дейін созылуы мүмкін. Бұл біздің газетті мұқият оқитынымызды білдіреді. Бүгінгі таңда оқу мәдениеті төмендеп бара жатқандай, бірақ оны қайта қалыптастыру үшін барымызды саламыз», деді министр.
Ақмарал АҒЗАМҚЫЗЫ,
«Егемен Қазақстан»
