Сенаторлар алдымен Ақпәтер ауылдық округі аумағындағы Орал-Көшім жүйесінен бассейнаралық суды тасымалдауға арналған Киров-Шежін арнасын жаңғырту жұмыстарының барысына куә болды. Ресейден келетін суға тәуелділікті азайтуды мақсат еткен бұл жобаны жүзеге асыру үшін республикалық бюджеттен қомақты қаражат бөлінген болатын. Қараша айының аяғына дейін бұл құрылыс пайдалануға берілетін болады.
Сенаторлар одан кейін Жалпақтал ауылындағы екі қабатты 12 пәтерлік тұрғын үй құрылысында да болды. Депутаттар К.Меңдәлиев атындағы мектептің музейі мен ІТ сыныбын көріп, қазіргі заманғы техникамен жабдықталуы барысымен танысты. Сапар барысында Ғ.Молдашев атындағы мектепте, Жалпақтал ауруханасында, «Ертегі» бөбекжайында болған сенаторлар мекеме қызметкерлерімен жүздесу кезінде Жолдаудың негізгі бағыттарын түсіндірді. Ұжым мүшелері Елбасының жүргізген саясатын, Жолдауды тыңдап, әрдайым қолдайтындықтарын жеткізді. Сондай-ақ «Педагогтар мәртебесі туралы» заңның қажеттілігі, Жастар жылын жариялаудың маңызы, агроөнеркәсіп коопертивтері мен қайта өңдеу саласын, жалпы бәсекелестік пен өмір сапасын артыруға бағытталған бағдарламалардың қажет екені айтылды.
