Қазақстан Президентінің өзге елдерге сапары барысында шетелдік бизнес өкілдерімен кездесу ұйымдастыруы дәстүрге айналған. Осының арқасында елімізге инвесторлардың қызығушылығы, әлем елдерімен сауда-экономикалық стратегиялық серіктестігіміздің ауқымы жылдан-жылға кеңейіп келеді. Мемлекет басшысы айтып өткендей, соңғы жылдары Еуропа елдерімен тауар айналымы тұрақты түрде өсіп келе жатыр. Қазақстанда Еуропа капиталының қатысуымен түрлі салаларда 3 мыңға жуық кәсіпорын жұмыс істейді.
Елбасының осы жолғы сапары барысында да еуропалық бизнес өкілдерімен кездесуі Қазақстанда қолайлы инвестициялық климат қалыптасқанын және екіжақты әріптестік тиімді шарттар негізінде жүзеге асырылатынын жоғары дәрежеде тағы бір нақтылады.
Бүгінде еуропалық инвесторлардың Қазақстанға қызығушылығы жоғары. Ол тек қана шикізат саласына қатысты емес, еліміздің географиялық тұрғыдан орналасуы да – тартымдылықты еселей түсетін фактор. Мемлекет басшысы осы мәселеге ерекше көңіл бөліп, Қазақстан Еуропа мен Азия арасын байланыстыратын көпір болуға дайын екендігін баса айтты. Егер соңғы уақытта Еуропа және Азия елдері арасындағы байланыс қарқынды дамып келе жатқанын ескерсек, мұндай ұсыныс Қазақстанға тиімді нәтиже алып келері сөзсіз.
Айта кетерлігі, Брюссельде өткен «Азия-Еуропа» форумының 12-ші саммитінің негізгі тақырыбы да Азия мен Еуропа арасындағы байланысты күшейтуге арналды. Сол себепті бұл мәселе төңірегіндегі пікір алмасу саммит шеңберінде де жалғасын тапты. Тұтастай алғанда, Елбасының Еуропаның іскер топтар өкілдерімен кездесуі еліміздің сауда-экономикалық байланыстарына серпін беретін маңызды шара болды.
Жәнібек АРЫНОВ,
Әлемдік экономика және саясат институтының сарапшысы
