Аудан орталығындағы Халық пен Жаннат Уахитовтардың отбасында 3 ұл, 3 қыз тәрбиеленуде. Көңіл қуантарлық бір жағдай, осы отбасындағы балалардың бәрі де сабақтарына зерек, тілалғыш. Еңбекқорлықтарымен ұстаздарының да, ауыл тұрғындарының да жылы ілтипаттарына бөленуде.
Ауылда тұрған соң, қазекеңнің бойына сіңген қасиеттерінің бірі аулада азын-аулақ ірі қара, қой-ешкісін ұстамаса ішкен астары бойына сіңбейтін әдеттері бар емес пе? Сол сияқты Уахитовтар отбасында осы дәстүр әуелден қалыптасса, соңғы кездері бұл үйдің ауласында тауық, қаз өсірумен бірге, балалары қоян асырауға да ден қоя бастаған көрінеді деген әңгімені жиі ести бастадық.
Жақсы бастамадан құлағдар болған соң еңбекқор балғынның қолға алған игі ісін де көруге де ынтық болдық. Қадыр ақын атындағы орта мектептің 8-сынып оқушысы Мадияр Уахитовтың елгезек, еңбекқор бала екендігіне куә болдық.
– Үй қоянын өсіруге әуелден-ақ ынтық едім. Ақыры осы кәсіпке әуестігім еркіме қоймастан, өткен жылдың күз айынан қоян өсіруді қолға алдым. Әуелі бір қоянды 2000 теңгеге сатып алып, 3 ай баптап, өсірген соң, ауыл тұрғындарына 4000 теңгеге сатып жібердім. Әрі қарай қоян өсіруге, оларды баптап-күтуге деген құштарлығым арта түсті, – дейді әңгіме арасында Мадияр ағынан жарыла.
Адам баласы бастаған ісін қолға алған соң, жігерленіп, құлшына еңбек етуге талпынып тұрады екен. Мадиярда да осы қасиеттің байқалғандығы шындық.
Қоян өсіруге ден қойған Мадияр бір аталық пен бір ұрғашы қоянды сатып алып, өткен қыс бойы асыраған соң, наурыз айында 9 көжек туып, кәсібі де дөңгеленіп жүре берді. Қояндарды өсіруге де уақыт керек, жағдай туғызу қажет.
Мадияр 11-сыныпта оқитын ағасы Қуанышпен бірлесіп, әр қоянға бөлек үйшік жасап, сәбіз, көк шөп, жем-суын беруге үнемі назар аудара білді.
Ол жемісін де бере бастады. Қояндарды будандастыру арқылы көжектер де тез өсіп, Мадияр әр көжекті 1000 теңгеден, 3 айлық қоянды 1500-2000 теңгеден тұрғындарға сатып, келісімге орай 1 қоянды 4 тауыққа айырбастап, аула ішін тауық, қазға толтыруға да тың әдіс таба білді.
– Шүкір, балаларым еңбекқор болып ер жетіп келеді. Сабақтарына да ұқыпты. Өткен жылы ұлым Қуаныш Астана қаласындағы ЭКСПО-2017 халықаралық көрмесіне барып, мол әсермен елге оралды. Балалардың қорадағы азын-аулақ малды бағып, өздері еңбек етуге талпынғандары, әрине жақсы. Өткен жылдан бастап ұлым Мадияр қоян өсіруді кәсіп етуде.
Қазірде үйшіктерінде 8 қояны бар. Қояндарын сатуға шығарудан түскен қаржысына киім-кешек, кітаптарын алуға да қолдары жетуде, дейді отағасы Халық Уахитов риза көңілмен.
Иә, ауласында қоян өсіруге, ниет қойып отырған оқушы Мадияр Уахитов жөнінде айтарымыз осы еді.
Мадиярдың өсірген қояндарын тамашалап, қоянның қызыл қуырдағынан дәм татамын десеңіз, өкінбесіңіз анық, ағайын!
Мүсірбек АЙТАШЕВ
Батыс Қазақстан облысы,
Сырым ауданы