Макс Агилера-Хеллвег, «Нью-Йорк Таймс»
КЕЙД МЕЦ және МАКС АГИЛЕРА-ХЕЛЛЬВЕГ, «НЬЮ-ЙОРК ТАЙМС» – УАЛТЭМ, МАССАЧУСЕТС
Бұл робот – SpotMini деп аталады. Оны жануарлар мен адамдар сияқты қозғалатын робот жасаумен танылған Boston Dynamics компаниясы құрастырды. 1992 жылы негізі қаланған компания жаңа жылдан бастап алғашқы коммерциялық робот – SpotMini-ді саудаға шығаруды жоспарлап отыр.
Әйтсе де мұндай роботтарды қандай мақсатта пайдалануға болатыны белгісіз. Бірнеше жылдан бері адамдар Boston Dynamics компаниясына «бұл бизнес пе, әлде зерттеу жұмысы ма?» деген сұрақты үздіксіз қойып келеді.
«Біздің ойымызша, мұндай технологияны тиімді қолдана бастауға мүмкіндік бар. Алайда, қазір оның негізгі қызметі қандай болатынын нақты шешкеніміз жоқ», дейді компанияның негізін салушы Марк Райберт.
Басқа компаниялар роботталған автомобильдер, жолдар мен қойма едендерінде еркін қозғала алатын құрылғылар жасаумен шұғылданады. Ал жапондық SoftBank конгломератына тиесілі Boston Dynamics тау-таста, орманда қиналмай жүретін машина құрастыруға кірісіп кетті.
Қазіргі таңда жүргізушісіз басқарылатын көліктер қолданысқа енбей, дербес қозғалатын роботтардың күні алыс секілді. Өйткені олардың әлі де кемшіліктері бар. Олар кедергілерді анықтау немесе өрмелеу сияқты кейбір тапсырмаларды өз бетінше жасағанымен, бейтаныс жерлерде әлі күнге дейін арнайы нұсқаулықты қажет етеді. Анығын айтқанда, олар жиі сүрініп, жиі құлап жатады.
М. Райберт салмағы 75 килограмм, жүгіретін, секіретін, тіпті сальто жасай алатын антопоморфты робот Атласты ең үздік деп есептейді. Алайда, алғашқы сынақ кезінде инженер джойстикті басқанда, робот еденге құлап түсті.
SpotMini роботының сатылым жоспары әлі шикі. Өйткені оның құны автокөліктің бағасынан кем емес және роботты құрылыс компанияларына сату көзделген. М.Райберт мырза олардың ойлы-қырлы, адамдарға қауіпті жерлерде зат тасымалдауға мүмкіндік беретінін алға тартады.
Технология жетілген сайын SpotMini жеткізу роботына не дербес күзетшіге айналуы мүмкін.
Осының бәріне қарамастан, Boston Dynamics-тің бастамасына қызығушылық танытып отырғандар бар. Ұзақ уақыт зерттеуді қажет ететін технологияға Сауд Арабиясының ханзадасы Мохаммед бин Салман 100 миллиард доллар инвестиция салып, компаниямен серіктестік орнатты.
Жапониялық ғалымдар роботтарды назардан тыс қалдырған емес. Google компаниясына тиесілі Schaft компаниясы Boston Dynamics сияқты машиналарды зерттеумен айналысады. Ал Toyota зерттеу институты Жапонияда қарттарға қызмет көрсететін роботтар жасаумен айналысып жатыр.
Марк Райберт Boston Dynamics роботтарын бизнес өкілдеріне, үкімет пен басқа да клиенттерге сатқысы келеді. Адамдар мен жануарлардың әрекетін қайталайтын машина жасайтын ол өзін «темірге жан беруші» деп атайды. Оның мақсаты осы арқылы ақша табу болса да, ғылымға тигізер көмегі орасан.
Әрине таңданарлық жайт. Алайда, роботтардың сальто жасауға қабілеттілігі сатып алушыларды жинай ала ма?
Мақаланы аударған Мәдина ЖӘЛЕЛҚЫЗЫ,
«Егемен Қазақстан»
