Конференцияның ашылу салтанатына және жоғары деңгейлі сессияға ҚР Премьер-Министрі Б. Сағынтаев қатысты.
ДДСҰ-на мүше 140 елдің, халықаралық ұйымдар мен әлемдік академиялық элитаның өкілдері — барлығы 1500-ге жуық қатысушы Астанада бас қосты. Шара ұйымдастырушылары Қазақстан Үкіметі, Дүниежүзілік денсаулық сақтау ұйымы мен ЮНИСЕФ болды.
Конференция қатысушыларының негізгі мақсаты — медициналық-санитариялық алғашқы көмекті одан әрі дамытуды жоғары деңгейде талқылау, медициналық-санитариялық алғашқы көмек бойынша Астана декларациясын қабылдау.
Конференцияны Қазақстан Президенті Нұрсұлтан Назарбаев ашып, бейнебайланыс жүйесі арқылы шара қатысушыларына өз сөзін арнады.
«Денсаулық сақтауды жақсартуға бүкіл әлемде үлес қосу медициналық қауымдастықтың маңызды игі ісіне айналды. Ол тарихи құжат (БҰҰ “Әлемдік денсаулық сақтаудың ұлы хартиясы” деп атаған Алматы декларациясы) басқа елдердің көптеген ЖОО-ларының оқулықтарына енді. 1978 жылы қол қойылған ДДСҰ Декларациясы халықаралық ұмтылыстардың көрнекті мысалына айналды. Құжатта МСАК дамытудың негізгі қағидалары атап көрсетілген. Бұл халықты санитарлық ағартуды, ана мен бала денсаулығын қорғауды, аурулардың алдын алуды, оның ішінде екпе егуді, сондай-ақ дәрі-дәрмектермен қамтамасыз етуді қамтиды. Сол уақыттан бастап бүкіл әлемде денсаулық сақтау осы басты бағыттарға сәйкес дамыды», — деді Қазақстан Президенті.
Мемлекет басшысының айтуынша, бүгінде адамзат алдында жаңа сын-тегеуріндер тұр — қоршаған ортаның нашарлауы, аз қимылдауға әкелетін өмір салты, сапасыз ас созылмалы аурулардың көбеюін тудырды.
«Өз кезегінде, халықтың ауру-сырқауы мәселелері әлеуметтік қамту жүйесіне жүктемені арттырады. Денсаулық сақтауды қаржыландыру мен медициналық қызметтермен жаппай қамту мәселелерінің қазіргі кезде маңыздылығы мен өзектілігі зор. Бұл тақырыптар 2019 жылы БҰҰ Бас Ассамблеясының талқылауына енгізіледі», — деді Президент.
Сонымен қатар Елбасы технологиялық революция дамуының қазіргі беталыстары адамзат үшін жаңа перспективалар ашып отырғанын атап өтті.
«Бүгін Қазақстанда, әлемдегі тәрізді, цифрлық трансформация үрдістері белсене жүргізіліп жатыр, оның ішінде денсаулық сақтау саласы да қамтылған. Халықтың денсаулығын қолдауды қамтамасыз ету – ұлттың орнықты дамуы мен әл-ауқатының өсуінің негізі. Мен барлық елдердің көшбасшыларын мұны мемлекет саясатының басты басымдығы ретінде белгілеуге үндеймін. Медициналық-санитариялық алғашқы көмек туралы жаңа Астана декларациясының қабылдануы дүниежүзіндегі денсаулық сақтау жүйесін жетілдіру жолында маңызды іс болады. Бұл бағдарламалық құжаттың жаһандық деңгейде адамдардың өмір сапасын арттырып, денсаулықтарын нығайтуға септігін тигізетініне сенемін. Конференцияға белсене қатысқандарыңыз үшін алғысымды айтамын, табыс пен жемісті жұмыс тілеймін», — деді Қазақстан Президенті.
Сонымен қатар, БҰҰ бас хатшысы А. Гуттериш бейнебайланыс арқылы Жаһандық конференция қатысушыларына сөзін арнады.
«Халық денсаулығы – орнықты дамудың нәтижесі мен драйвері. Денсаулық сақтау сапасы өмір ссапасымен тікелей байланысты. Біздің денсаулық сақтау жүйеміз, бірінші кезекте, алдын алуға бағытталған. 40 жыл бұрын Алматы декларациясы алғашқы медициналық көмектің маңыздылығын мойындады, дегенмен де қазірдің өзінде алғашқы медициналық көмек ала алмай отырған адамдар саны көп. Мақсат айқын – адамдардың дене және психологиялық әл-ауқатын қорғап, оған ықпал ету. Осы мақсатты ұстанатыныңызға алғыс айтамын», — деді БҰҰ Бас хатшысы.
Қазақстан Премьер-Министрі Бақытжан Сағынтаев өз сөзінде Астанада Жаһандық конференцияны өткізудің маңыздылығын атап өтті. 40 жыл бұрын Қазақстан жерінде Алматы декларациясы қабылданды. Бұл құжаттың маңыздылығы, адамзат тарихында тұңғыш рет адамдардың денсаулық сақтауға тең құқығын барлық мемлекеттердің ресми түрде мойындауы болды. Сонымен қатар, әлемнің өзгеруін есепке алғанда, технологиялық прогресс көзқарастардың жаңаруын және жаңа сын-тегеуріндерге үн қатуды талап етеді.
«ДДСҰ-ға мүше елдердің, халықаралық ұйымдар мен академиялық қауымдастықтың бірігіп күш-жігер салуының нәтижесінде медициналық-санитариялық алғашқы көмек туралы жаңа Декларация әзірленді. Оның қабылдануы кез келген елдің денсаулық сақтау жүйесінің негізі ретінде МСАК-ның дамуы үшін бағыт-бағдар болады. Жаңа Декларацияда жетілдірілген МСАК арқылы баршаның денсаулыққа қол жеткізуі үшін мемлекеттің, адамдардың, қауымдастықтардың, денсаулық сақтау жүйесі мен серіктестерінің міндеттемелері көрсетілген», — деп Б. Сағынтаев, Астанадағы Жаһандық Конференция көптеген сауалдарға жауап табуға мүмкіндік беретініне сенім білдірді. Қазақстан ашық диалог пен өзара іс-қимыл орнатуға әзір.
Бұдан әрі пленарлық отырыс барысында Әулие Рим папасы Франциск үндеуін жария еткен Архиепископ өкілі Фрэнсис Чулликат; Непалдың денсаулық сақтау министрі, Премьер-Министр орынбасары Упендра Ядав; Дүниежүзілік денсаулық сақтау ұйымының бас директоры Тедрос Адханом Гебрейесус; БҰҰ Балалар қорының (ЮНИСЕФ) атқарушы директоры Генриетта Фор; Денсаулық сақтау және азық-түлік қауіпсіздігі мәселелері жөніндегі еуропалық комиссар Витянис Андрюкайтис және т.б. сөз сөйледі.
Делегаттардың сөз сөйлеу қорытындылары бойынша «Денсаулық сақтау қызметтерімен жаппай қамту бағытында медициналық-санитариялық алғашқы көмекті дамытудағы жалпыүкіметтік тәсіл» Астана Декларациясын қабылдау салтанаты өтті.
Астана декларациясын қабылдау кез келген елдің денсаулық сақтау жүйесінің негізі ретінде бүкіл әлемдегі XXI ғасырдағы МСАК жүйесін дамытуды айқындауға мүмкіндік береді, сол арқылы медициналық қызметтермен жаппай қамтуға және баршаға арналған денсаулыққа қол жеткізуге болады. Жаңа Декларацияда тұрақты МСАК арқылы барлығы үшін денсаулыққа қол жеткізудегі мемлекеттердің, адамдардың, қауымдастықтардың, денсаулық сақтау жүйесі мен серіктестердің міндеттемелері көрсетіледі. Одан соң МСАК және жаппай қамту мәселесін 2019 жылы қыркүйек айында мемлекеттер басшылары деңгейінде БҰҰ Бас Ассамблеясындағы жоғары деңгейлі кездесуде ұсыну көзделіп отыр.
Шара денсаулық сақтау, қаржы, экономика, білім беру, қоршаған орта министрлері мен халықаралық ұйымдардың басшыларының қатысқан пленарлық отырыстармен және сессиялармен жалғасты. Сонымен қатар конференция бағдарламасы сайд-ивент, пікірталастық сессиялар және көрмелер секілді іс-шараларды да қамтыған.
Конференция аясында бірқатар қосымша шаралар ұйымдастырылғанын айта кету керек. Олардың қатарында Алматы қ. ДДСҰ Еуропалық желісінің мэрлерінің «Салауатты қалалар» саммиті, «Назарбаев университеті» базасындағы жастар форумы, Walk the Talk, Астанадағы Ұлттық музейде өтетін хакатон мен «Денсаулық сақтаудағы АТ» көрмесі бар.
