Іс-шараға Ұлттық экономика министрі Тимур Сүлейменов, «Esquire Kazakhstan» басылымының шеф-редакторы Гүлнәр Бажкенова, «Стратегия» әлеуметтік және саяси зерттеулер орталығы» қоғамдық қорының өкілі Гүлмира Елеуова, Мәжіліс депутаты Аманжан Жамалов, «Атамекен» ұлттық кәсіпкерлер палатасы жаппай кәсіпкерлік және шағын несиелеу департаментінің директоры Бауыржан Оразғалиев қатысты. Дәстүр бойынша басқосудың модераторы міндетін «Талап» қолданбалы зерттеу орталығының директоры Рахым Ошақбаев атқарды.
Пікірталас отырысын ашқан «Нұр Отан» партиясы Төрағасының бірінші орынбасары Мәулен Әшімбаев Елбасының Жолдауын жүзеге асыру еліміздің күн тәртібінде тұрған басты міндет екенін айтып, бұл құжат әр қазақстандықтың әлеуметтік жағдайын жақсартуға бағытталғанына назар аударды. Сондай-ақ ол «Нұр Отан» партиясының Жолдау басымдықтарының жүзеге асырылуына қоғамдық бақылау жүргізетінін тілге тиек етіп, осы бағыттағы тиімді тетіктерге тоқталып өтті.
– Елбасы Жолдауында қоғамда қызу талқыланып, бұқаралық ақпарат құралдары мен әлеуметтік желілерде жиі көтеріліп жүрген өзекті мәселелердің нақты шешімдері көрсетілген. Соның ішінде баспана мәселесі, шағын және орта бизнес, тұрғын үй-коммуналдық шаруашылығындағы тарифтерді шектеу, азаматтардың қауіпсіздігі сияқты көптеген мәселе қамтылған. Бұл мәселелер үшін бірінші кезекте Үкімет, мемлекеттік органдар және әкімдер жауапты болғанымен, азаматтық қоғам, үкіметтік емес ұйымдар және саяси партиялар да олардың оң шешілуіне мүдделі. Сондықтан Елбасы айқындап берген мақсат-міндеттерге қол жеткізу үшін бүкіл қоғам болып жұмылудың берері мол. Осы ретте еліміздегі жетекші саяси күш ретінде партиямыз Жолдау басымдықтарын жүзеге асырудың тиімді тетіктерін әзірлеу жұмыстарына белсенді қатысуға және әрі қарай қоғамдық бақылауды қамтамасыз етуге дайын, – деді М.Әшімбаев.
Мемлекет басшысының Жолдауын жүзеге асыру үшін Жалпыұлттық іс-шаралар жоспары бекітілгені белгілі. Соның аясында шамамен 100 іс-шара өткізілмек. Олар: халық табысының өсуі, тұрмыс сапасын арттыру, өмір сүруге жайлы орта қалыптастыру, азаматтар сұранысына бейімделген мемлекеттік аппарат, тиімді сыртқы саясат және әрбір қазақстандықтың еліміздегі өзгерістер үдерістеріне атсалысуы сияқты 6 бағыт бойынша іске асырылмақ.Елбасы бастамаларының қаржылық көлемі 1,5 триллион теңгеден асады. Ал жиынтық әсері одан да көбірек.
Осыған орай Президент Әкімшілігінде Елбасы тапсырмаларының орындалуын қатаң бақылап, тексеріп, жүйелі жүзеге асырылуын талап ететін және сол бойынша Мемлекет басшысына есеп беретін Ұлттық жаңғыру комитетін құру жоспарланып отырғаны да белгілі. Отырыста бұдан басқа да көптеген ұтымды ұсыныс пен түрлі пікір айтылды. Оның тоқетерін Елбасы Жолдауының жүзеге асырылуына, оған бақылау жүргізу ісіне қоғамды, сарапшыларды, үкіметтік емес ұйымдарды, саяси партияларды, басқа да мүдделі құрылымдарды тартудың маңызы зор деген бірауыз сөзбен түйіндеуге болады. «Нұр Отан» партиясы дәл осы бағытта белсенді жұмыс істемек.
Қатысушылар көтерілген мәселелер бойынша өз ой-пікірлерін ортаға салды. Іс-шара дәстүрге сай онлайн-режимде өтіп, Facebook желісінде тікелей эфирде көрсетілді. Осы ретте пікірталас қорытындысы бойынша нақты ұсыныстар пысықталып, олар Үкімет, Парламент және жергілікті атқарушы органдарға жолданатынын атап өткен жөн.
Жақсыбай САМРАТ,
«Егемен Қазақстан»