Жиынға Сыртқы істер министрі Қ.Әбдірахманов, Инвестициялар және даму вице-министрі Қ.Өскенбаев, «KazakhExport» экспорттық сақтандыру компаниясы» АҚ, «Атамекен» ұлттық кәсіпкерлер палатасы және «Бәйтерек» ҰБХ» АҚ басшылары мен халықаралық бизнес-қауымдастықтар өкілдері қатысты. Шараны Сыртқы істер министрі Қ.Әбдірахманов ашты.
«Бұл жиын сауда мен инвестицияларды ілгерілету тұрғысынан өте маңызды шара болып отыр. «Атамекен» ұлттық кәсіпкерлер палатасы және «KazakhExport» компаниясымен экспортты ілгерілетудегі күш-жігерімізді біріктіру үшін келісімге қол қоямыз. Меморандум бірге жұмыс істеудегі кең ауқымды мәселелерді қамтиды», деді министр.
Сондай-ақ сыртқы істер ведомствосының басшысы жаһандық тәжірибеге сәйкес, инвестициялар мен экспортты ілгерілету жөніндегі мақсаттар өзара байланысты екенін атап өтті. 2022 жылға дейін Қазақстан экономика секторының экспорттық әлеуетін бір жарым есеге өсіру жоспарланып отыр. 2016 жылмен салыстырғанда елдің экспорттық әлеуеті 31%-ға артып, 48,3 млрд АҚШ долларын құрады. Биылғы деректер бойынша, бұл оң үрдіс 28% өсіммен сақталып отыр. Алдағы
3 жыл ішінде Қазақстанның экспорттық әлеуетін арттыру мақсатында Сыртқы істер министрлігі мен «Атамекен» ҰКП және «KazakhExport» ҰК біріге жұмыс істейтін болды.
«Атамекен» ұлттық кәсіпкерлер палатасы мен «KazakhExport» компаниясы еліміздің экспортын ілгерілетудегі негізгі құралдар болып отыр. Қазақстан инвестицияны қабылдауға қашанда дайын. Жаңа өндірістерді ашу үшін бізде экспортты қолдау жөніндегі ұлттық стратегиялар әзірленді. Біз инвестиция алмасуға, сондай-ақ тауарлардың сыртқы нарықта ілгерілеуіне үлкен көмек көрсетуге дайынбыз», деді Инвестициялар және даму вице-министрі Қ.Өскенбаев.
Жиын соңында Сыртқы істер министрлігі, «Атамекен» ұлттық кәсіпкерлер палатасы мен «KazakhExport» ұлттық компаниясы арасында өзара түсіністік пен ынтымақтастық туралы меморандумға қол қойылды.
Маржан ТІЛЕУБЕК,
«Егемен Қазақстан»
