Елімізде Мемлекет басшысы Нұрсұлтан Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауының негізгі ережелерін түсіндіру және оны қалай жүзеге асыруды талқылау жұмыстары жан-жақты жүргізілуде. Жақын да жарқын келешектегі жұмыстардың жай-жапсары егжей-тегжейлі айтылған Елбасымыздың көңілге көп серпіліс әкеліп, көкейге тың ойлар түйгізіп, жаңа мүмкіндіктерге жол ашар бұл жолғы Жолдауының бізге – Қазақстанның әрбір азаматына артар жүгі салмақты. Өйткені бұл – Мемлекет басшысы қойған қомақты міндеттердің алда атқарылуы тиіс негізгі басымдықтарын айқын белгілеп берген стратегиялық құжат. Мұндағы Елбасының сенімге толы әрбір сөзі қарапайым халықты қуантқан жақсы жаңалықтар мен жағымды талаптардан тұрады. Ең бастысы, халық игілігі үшін қозғалған әлеуметтік тақырып.
Осы орайда Елбасы жергілікті бюджеттен жеңілдетілген ипотеканың алғашқы жарнасын субсидиялау бойынша жан-жақты жұмыс жүргізуді тапсырды. Мемлекет басшысы мәлімдегендей, мұндай тұрғын үй сертификаттарын беру мұғалімдер, дәрігерлер, полиция қызметкерлері және басқа да жергілікті өңірлерге қажетті мамандық иелері үшін ипотеканың қолжетімділігін арттыра түспек. Бұл тұрғыда елімізде алғашқы жарнаны азайту бойынша жұмыстар басталып та кетті. Осыған сәйкес, «7-20-25» бағдарламасына қатысуға ниет білдірген азаматтардың алғашқы жарнасын арзандату үшін жалпы саны 50 мың данадан кем емес тұрғын үй сертификаттары шығарылатын болыпты. Сонда, Қазақстан халқына үстіміздегі жылдың аяғына дейін 10 мыңдай сертификат тапсырылмақ.
Ақы төленбейтін қыруар жұмыстарға жегіліп жатқан мұғалімдер мәртебесі туралы заң қабылдау, оқушының үш ауысымда оқуына жол бермеу туралы, толып жатқан спорт кешендерінің халық игілігі үшін жұмыс істеп, олардың әрбір балдырған үшін тегін болуын, сауықтыру орталықтарының әрбір аулада салынуын тапсырған Елбасымыз «Назарбаев зияткерлік мектебі» стандартының орта мектептерде де қолданылуын, қолда бар инфрақұрылым негізінде Назарбаев Университет үлгісімен политехникалық жоғары оқу орнын құру туралы, еліміздің жоғары оқу орындарына деген халық сенімін нығайту, ол үшін, ең алдымен оқыту мен білім сапасын арттыру, жоғары білімнің қолжетімділігіне жағдай туғызу, оларды бітірген студенттерді мамандықтары бойынша жұмысқа орналастыру туралы талаптарды орынды көтерді.
Шынында да жұмысқа тұруға жол ашпайтын дипломның қажеті қаншалықты? Еңбекке араласуға мүмкіндігі болмайтын білімгерлерінің саны сол жоғары оқу орнының сапасының да айқын айғағы екені рас. Сол себепті әлсіз білім ордалары әшейін өмір сүруін тоқтатып, нарық экономикасына төтеп бере алатын ЖОО-лар ғана сақталуы тиіс.
Білім саласы ғана емес, ТКШ, инфрақұрылымдар сапасы, денсаулық сақтау саласы жөнінде де қолға алынып жатқан шаралар жетерлік. Келер жылдан бастап жалақысы 20 пайызға ұлғайтылатын учаскелік медициналық қызметкерлер, жаппай ипотеканы алуларына енді мүмкіндік жасалатын дәрігерлер, полицейлер, мұғалімдер қауымы, кезінде урбанизацияның қауіпті тасқынымен болашағы буалдыр тартқан туған мекенін тастауға мәжбүр болып, үлкен қалаларды паналаған шарасыз жұрт та Елбасы қамқорлығына көз жеткізуде. Отбасыларға арналған жатақхана типтес көппәтерлі үйлер салынатын болып жатыр. Алматы облысында етті сүйегіне дейін өңдейтін ірі зауыттың іргетасы қаланып, іске қосылғалы жатқан сүйінші хабарын Елбасының өз ауызынан естідік. Ендеше, азық-түлікті шеттен әкелу доғарылып, сыртқа шикізат емес өндірілген өнімімізді сатып, Отанымызда халықтың тұтынуына қолайлы тауарлар көптеп шығарылып, өз елімізден шыққан отандық киіммен емін-еркін киіне бастайтынымыз керемет қой.
Заңгерлер мен тәртіп сақшыларының да іс-әрекеттеріне тоқталып, 2019 жылғы 1 қаңтардан бастап шағын және орта бизнеске «салық амнистиясын» жариялаған Елбасының айтқанындай, Дүниежүзілік банктің «Бизнес жүргізу жеңілдігі» жөніндегі рейтингісі бойынша Қазақстанның 190 елдің ішінде 36-орынға көтерілгені зор қуаныш. Осы жылдар ішінде саны 18 миллионнан асып, өмір сүру ұзақтығы 72,5 жасқа жеткен халқымыздың дені сау болуы үшін тамақ пен дәрі-дәрмектің, ауыз судың сапалы болуы, мүмкіндігі шектеулі жандардың күнделікті қажеттерін өтеуге ұдайы көмек берілуі, білім, ғылым, медицинаға ішкі жалпы өнімнің 10 пайызының жұмсалуы басты назарда ұсталатындығын баса айтқан Нұрсұлтан Назарбаев бір бөлімде отырған он адамның үшеуі ғана өндірте жұмыс істеп, қалғандарының маңдай тері төгілмей-ақ жалақы алатыны жайлы жайттардан да қарапайым мысалдар келтірді. Еңбегіне қарай ақы төлеу жақтарын қарастырып, жұмыстарды оңтайландыру, ішінара қысқарту ісін ұйымдастырғанда Түркістан облысының бір өзіндегі екі бірдей мектепке екі түрлі баға – жер мен көктей айырмасы бар екі түрлі құн белгіленгенін қатты сынға ала отырып, формализмге ұрынбау керектігін қатаң ескертті.
Елбасының биылғы Жолдауында жастарымызға да үлкен көңіл бөлгеніне куәміз. Елбасы Нұрсұлтан Назарбаев оларға ерекше сенім арта отырып, барлығының жағдайын жасауға баса назар аударады. Ел Президентінің жыл сайынғы жолдауларының басым бағыттары жастармен тікелей байланысты болуы, кез келген мемлекеттік маңызы бар стратегиялар мен мақалаларында, сөздерінде әркез өскелең ұрпақты тілге тиек етуі – соның айқын дәлелі. Білім және ғылым министрлігінің жанында Елбасының тікелей тапсырмасымен Жастар саясаты жөніндегі комитеттің, жергілікті жерлерде басқармалардың құрылуы, Жастар саясаты туралы мемлекеттік заңға өзгерістер мен толықтырулардың енгізілетіндігі, 2020 жылға дейінгі арнайы тұжырымдаманың қабылданғаны – жастарды қанаттандырды. Елдің болашағы оларға берілген тәрбиеге байланысты. Сондықтан бүгіннің өзінде жастармен жұмыс істейтін мемлекеттік органдардың бәрінде Президенттің Жастар жылы деп жариялауы аясында жүргізілер жұмыстардың жүйесі жоспарлануда.
Жалпы, Президент Жолдауындағы міндеттерді жүзеге асыруға бір жарым триллион теңге аударылатынын еске алсақ, бұл – қазақстандықтардың әл-ауқатын арттыруға барынша тиімді жұмсауымызды қажет ететін үлкен қаражат. Тек қана іске сәттілік тілейміз.
Үміт БИТЕНОВА,
ақын, Қазақстан Жазушылар одағының мүшесі
