Форум аясында Алматы облысындағы туризмді дамыту мақсатында ашылған Zhetisu Travel орталығының тұсаукесері жасалып, ұлттық тағамдардың «Той қазан» VI фестивалі де келушілер назарына ұсынылды.
– Мемлекет басшысы жақында жарияланған Жолдауында сырттан келетін және ішкі туризмді дамытуға ерекше көңіл бөлуді және салалық мемлекеттік бағдарлама қабылдауды тапсырған болатын. Осы ретте мемлекеттік бағдарлама жобасына Алакөл жағалауы, Іле Алатауының тау кластері, Шарын шатқалы сияқты облыстың ірі туристік рекреациялық аумақтарын дамыту бағытындағы ұсыныстар енгізіліп, жоспарлары әзірленіп жатыр, – деді форумда сөз алған облыс әкімінің бірінші орынбасары Лаззат Тұрлашов.
Сондай-ақ халықаралық шараға арнайы келген Қытай Халық Республикасы Мәдениет және туризм министрлігінің Орталық Азиядағы өкілі Ван Шулинь Жетісу өңірінің туристік тартымдылығы әлемнің назарын аударып отырғанын, өз жерлестерінің де жыл сайын мұнда келіп демалуға ынталы екенін айтса, Қазақстан Туристік қауымдастығының атқарушы директоры, қазақстандық қонақүйлер мен мейрамханалар қауымдастығының президенті Рашида Шайкенова отандық туризмнің әлеуеті мен қызмет көрсету саласындағы мәселелерді сөз етті.
– Халықаралық туризм нарығында бәсекеге қабілетті болу үшін біз ең алдымен бұл салада бай тарихымызды, мәдениетіміз бен салтымызды көрсете білуіміз керек, – деді Рашида Шайкенова өз сөзінде.
Мұнан бөлек маман саланы цифрландырудың мүмкіндіктеріне тоқталды. Оның айтуынша, бүгінде отандық туристік нысандардың тек 17 пайызы ғана өз қызметтерін жарнамалау мен сату арнасы ретінде интернет пен әлеуметтік желіні пайдаланып отырған көрінеді.
Жалпы, туристік әлеуетті арттыру бағытындағы халықаралық шараның Талдықорғанда өткізілуі тегін емес. Қазір облыс туризмнің табыстылығы жөнінен еліміз бойынша алғашқы орында. Қазіргі уақытта Алматы облысына келетін туристер қатары маусым сайын көбейіп келеді, дерек бойынша ол лек жылына 20-30 пайызға көбею үстінде екен. Мысалға, осы жылы Жетісудың әсем табиғатын тамашалап, жағажай аумағындағы демалыс орындарына келген туристер саны 2 млн адамға жеткен. Ал есеп бойынша Алматы облысына туризмнің дамуынан түскен қаржы 10 млрд теңге шамасында болмақ.
Қалмаханбет МҰҚАМЕТҚАЛИ,
«Егемен Қазақстан»
Алматы облысы
