Ақжолтай хабар Маврикий астанасы Порт-Луи қаласында өтіп жатқан Материалдық емес мәдени мұраны қорғау жөніндегі Үкіметаралық комитет отырысында мақұлданды.
«Қорқыт ата мұрасы: эпос мәдениеті, халықтың аңыз әңгімелері мен әуендері» номинациясын Қазақстан, Әзербайжан мен Түркия бірлесе әзірлеп, ұсынғанын бұған дейін хабарлаған едік. Ал «Қазақ атбегілерінің дәстүрлі көктемгі әдет-ғұрыптары» халқымыздың «қымыз мұрындық», «бие байлау» және «айғыр қосу» секілді ғұрыптарын қамтиды.
Қазақстан ЮНЕСКО-ның осы беделді құрылымының жұмысына алғаш рет толыққанды мүше ретінде қатысып отыр. Еліміз биылғы маусымда Парижде өткен 7-ші сессиясында Материалдық емес мәдениетті қорғау жөніндегі конвенция құрамына енген еді.
Осымен адамзатқа ортақ материалдық емес мәдени мұраның репрезентативтік тізіміне енген элементтердің саны онға жетті. Бұған дейін домбырамен күй орындау және киіз үй тігу өнері, айтыс, қазақ күресі, Наурызды мерекелеу, құсбегілік, қатырма нан пісіру, асық ойыны аталған тізімге енген болатын.
