Осыдан болар, биыл «Қазақстанның тұрғын үй құрылыс жинақ банкі» АҚ ұжымы бұрын-соңды болмаған үрдіс бастап, жаңажылдық мерекені Медеу мұз айдынында қарсы алды. Бұл бастамаға банктің 600-ге тарта қызметкері мен олардың отбасы мүшелері ортақтасты.
Таза ауадағы сергек демалыстың қала тұрғындары үшін де тағылымды тұстары бар еді. Медеуге сырғанауға барғандар Тұрғын үй құрылыс жинақ банкінің шат-шадыман мерекесінің ортасынан табылды. Алматылықтардың тағы бір легі алдағы күндері саламатты өмір салтын паш еткен банктің жаңа салымшыларына айналуы ғажап емес.
«Бүгін біз Медеу шатқалындағы үлкен корпоративте өткен жылға есеп беріп, үздік қызметкерлерімізді марапаттап, 2019 жылды ерекше қарсы алуға шешім қабылдадық. Мұндай корпоратив біздің банктің идеологиясымен толық үйлеседі. Шаһарымыздың керемет төрінде ұжым болып бір кісідей саф ауада коньки теуіп, спортты да насихаттап, айта жүрерліктей тамаша демалысты өткеріп жүрміз.
Ең бастысы, өз өмірімізді жақсартып қана қоймай, балаларымыздың алаңсыз келешегін қамтамасыз етіп, кең әрі әдемі үйлер мен пәтерлердің иесі атанамыз десек, құндылықтар жүйесін өзгерту керек. Әрі мұны ұдайы айтып отырамыз. Мәселен, қазір қоғамда белең алып тұрған бір мезеттік тұтынушылық идеологияға қарсылық ретінде ұзақ мерзімді жинақ мәдениетін қалыптастырып, дамыту қажет. Сондықтан осыған алдымен өзіміз үлгі болып, артық шығынсыз-ақ мерекені атап өтіп, көңіл көтеруге болатынын дәлелдейік деп шешім қабылдадық», дейді Тұрғын үй құрылыс жинақ банкі басқарма төрайымы Ләззат Ибрагимова.
Оқырман есінде болса, біз бұған дейін де банктің Қоғамдық кеңесі бар екендігін, оған елдің сөзі өткір танымал журналистері, аузы дуалы қоғам қайраткерлері мүше екенін баяндағанбыз. Сондықтан мерекелік оқиғаға отбасымен бірге ортақтасқан Қоғамдық кеңестің төрағасы, белгілі журналист Сергей Пономарев: «Біз бұл жолы жаңажылдық мерекемізді табиғаттың тамашасы Медеу мұз айдынына көшірдік. Бұл жерде көңіл күй де басқа, демалыс та өзгеше қызық. Ал Қоғамдық кеңестің міндетіне келетін болсақ, біз банк салымшыларының мүддесін қорғауға тиістіміз. Біз банк қызметіне, жаңа ұсыныстар мен өнімдерге бейтарап бақылау жасай отырып, банк клиенттерінің басқа да тілектерін басқарма қаперіне салып отырамыз. Қоғамдық кеңес мүшелері пікір алмаса отырып, салымшылардың сенімі мен банк қызметінің тұрақтылығына қызмет етеді. Бүгінгі мына мұз айдынына қараңызшы, мұндағы мерекелік ахуал керемет емес пе?! Амандық болса, келесі жылы Шымбұлаққа дейін өрлеуіміз мүмкін. Жұртқа жай ақыл айтқанша, алдымен өзің сол жолды бастап, саламатты өмір салтын өзің насихатта. Спортпен бірінші болып өзің айналыс, сонда ғана өзгелер саған ереді» дейді.
Не десек те, дарақылық пен ас та төк дастарқандардан бас тартып, Медеу шатқалын ғажайып мерекеге бөлеген банктің үрдісін шаһар тұрғындары үлгілі іс деп бағалады. Әрі мерекенің бұл түрін үнемшілдік пен парасаттылықтың да бір парасы деп білген жөн. Банктің корпоративтік мерекесіне еріксіз куә болған алматылықтар алдағы уақытта салымшы болуға септесетін жаңа ақпараттарға да қанық болды. Және жұртшылық банктің үздік қызметкерлерін еңбегіне сай Медеу төрінде марапаттағанын көрді.
– Биыл Тұрғын үй құрылыс жинақ банкі үйреншікті отырыстардан бас тартып, бала-шағамызбен тауға келдік. Бұл идея барша қызметкерлерімізге ұнады. Бәрі қолдай кетті. Осы арқылы біз қымбат мейрамханаларсыз да керемет демалуға болатынына көзіміз жетті. Және бұл мұз айдынына келгеніміз барша демалушыларға ұнап жатыр. Осы бастамамызбен Медеудегі бұқаралық спорт түрін де қоса насихаттап, жақсы бастамаларға ұйытқы болып отырғанымызға қуаныштымыз. Алдымен адамға баспанамен бірге мықты денсаулық, жақсы көңіл күй де керек. Үйлі боламын, күйлі боламын десең, той-томалақтарға шығындала берудің қажеті жоқ. Әрі мұндай мерекелер ұжымның ауызбіршілігін арттырады, – дейді Тұрғын үй құрылыс жинақ банкі басқарма төрайымының орынбасары Жанар Жұбаниязова.
Тұрғын үй құрылыс жинақ банкінің мейрамына тек қызметкерлер ғана емес, осы күні Медеуге коньки тебуге келген Алматы тұрғындары мен қонақтары да қатысты. Жиналған меймандар үшін мұз айдынында «Medeo band» музыка тобы өнер көрсетті. Сондай-ақ қызықты байқаулар ұйымдастырылды. «Тұрғын үй құрылыс жинақ банкі – қасаң мемлекеттік құрылым деген ойды өзгерткіміз келеді. 2018 жыл бойы біз клиенттермен және жалпы қоғаммен диалог жүргізудің жаңа әрі ерекше формаларын құру бойынша жұмыс жүргіздік», дейді Ләззат Ибрагимова.
Сондай-ақ көктемде банктің жыл сайынғы «Жасыл мекен» акциясы аясында Тұрғын үй құрылыс жинақ банкі қазақстандықтарды ауласы көгалдандыруды қажет ететін тұрғын үй кешендеріне дауыс беруге шақырған болатын. Соның нәтижесінде банк есебінен 1 мыңнан астам көшет отырғызылды. Дауыс беруге 25 мыңнан астам адам қатысты. Тамыз айында банк батыл қадам жасап, клиенттерге арналған смс-хабарламаларды жаңа, әзіл форматында таратты. Жыл басынан бері Тұрғын үй құрылыс жинақ банкі қызметкерлерді оқытудың ойын түріндегі әдістерін сәтті қолданып келеді. Бұл еңбектің нәтижесі ретінде банк «Қазақстан» номинациясында «Орталық Азияның HR-бренді» атты беделді жүлдеге қол жеткізді. Бұдан бөлек жақында Тұрғын үй құрылыс жинақ банкі кеңесшілер желісінің қатарына белсенді және талапты адамдар тартуды мақсат еткен «Орындалатын миссия!» республикалық онлайн-ойыны аяқталды. Аталған жоба да үлкен резонанс туғызып, оған бүкіл елден 2 мыңнан астам адам қатысты, ал әлеуметтік желілердегі ойын бойынша көрсетілім саны миллионнан асты.
Мереке соңында Тұрғын үй құрылыс жинақ банкі басшылары ел тұрғындарын келе жатқан 2019 жылмен құттықтап, әр адамға жаңа жылда пәтер мәселесін шешіп, қоныс той тойлауды тіледі.
Айнаш ЕСАЛИ,
«Егемен Қазақстан»
АЛМАТЫ
