Аймақтар • 15 Ақпан, 2019

Түркістан облысында Жетімдер үйі толықтай жабылады - Жансейіт Түймебаев

938 рет
көрсетілді
2 мин
оқу үшін

Түркістан облысында балалар үйі отбасы форматына көшіп, Жетімдер үйі толықтай жабылады. Бұл туралы бүгін облыс әкімі Жансейіт Түймебаев мәлімдеді. Облыс басшысы Жастар жылында Елбасы отбасы институты мен құндылықтарын дамытуға ерекше назар аударғанын атап өтті. Бұл туралы   ҚазАқпарат ақпараттық агенттігі хабарлады.

 

Түркістан облысында Жетімдер үйі толықтай жабылады - Жансейіт Түймебаев

 «Дәстүрлі отбасы құндылықтары сақталған Түркістан облысындағы көпбалалы отбасылар ұлттық демографияға айтулы үлес қосып келеді. Қазір облыста 130 мыңнан астам көпбалалы отбасы бар. Олардың ішінде 16 500 отбасыға 27 немесе 100 мың адамға атаулы әлеуметтік көмек көрсетіледі. Биыл көпбалалы отбасыларындағы жұмыссыз ата-аналардың жұмыс табуына, балаларға еңбек нарығында бәсекеге қабілетті болуы үшін қажетті техникалық және кәсіби білім беру мақсатында арнаулы көмек көрсетуді көздейтін "Қолғабыс" жобалар кешенін жүзеге асырамыз. Атап айтқанда, 2019 жылы облыста "Еңбек және нәтижелі жұмыспен қамту" бағдарламасы шеңберінде 3,3 млрд теңгеге 3700-ден астам балаға техникалық және кәсіби білім гранты беріледі. Оның ішінде көпбалалы отбасыдан шыққан балаларға басымдық беріледі», - деді Жансейіт Қансейітұлы.

Аймақ басшысының сөзінше, облыстағы азаматтарды әлеуметтік тұрғыда демеу үшін атқарылған жұмыстар мұнымен шектелмейді. Мәселен, «Еңбек» Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасы» аясында өткен жылы 69 682 адам қамтылып, жылдық жоспар 10,1 пайызға артығымен орындалған. Атап айтқанда, 1 160 адам 6,2 млрд теңгеге жеңілдетілген пайызбен шағын несие алса, 44 097 азамат жұмысқа орналасты. Қысқа мерзімді кәсіби оқуға 5 440 адам жолданып, 4 117 адам тұрақты жұмыспен қамтылды. Әлеуметтік жұмыс орындарына 4 529 адам жолданып, оның 2 818-і тұрақты жұмысқа орналастырылды. Жастар практикасына 4305 адам жолданды. Ауылдық жерлерде бірінші кезекте қажет мамандықтарды оқыту мақсатында «Әр ауылға өз шебері» жобасы іске асырылуда. 2558 азамат 24 біліктілік негізінде оқуға жолданды. Жалпы жыл басынан 31 000 жаңа жұмыс орны ашылды.