2018 жылы осы саладағы жалпы өнім көлемі 29 миллиард теңгені құрады. Ал негізгі капиталға салынған инвестиция көлемі 6 миллиард 700 миллион теңгеге жетті.
–Мемлекет тарапынан жыл сайын ауыл шаруашылығы тауарын өндірушілерге субсидия түрінде қолдау көрсетіледі. Өсімдік шаруашылығын дамытуға 865 миллион теңге көлемінде субсидия берілді. 3 миллиард 244 миллион теңгеге 57 бірлік ауыл шаруашылығы техникасы сатып алынды. Жеңілдетілген несиелендіру, ауыл шаруашылығы техникасын сатып алу барысындағы шығынды жартылай өтеу үшін мемлекеттік бағдарлама аясында 360 миллион теңге көлемінде субсидия бөлінді,–дейді аудан әкімі Асылбек Исмағамбетов.
Сандықтау ауданындағы шағын және орта бизнес қарқынды дамуда. Соның арқасында осы салада 6 мың адам еңбекпен қамтылған. Бұл көрсеткіш экономикалық белсенді тұрғындардың 57 процентін құрайды. Аудандағы ірі серіктестіктер маңызды мәселелерді шешуге белсене араласып, әрдайым қолдау көрсетуде. Ауданның 19 процентін жастар құрайды. Қазіргі күні спорт, білім, мәдениет салаларын дамытуға айрықша көңіл бөлінуде.
Байқал БАЙӘДІЛ,
«Egemen Qazaqstan»
