Тәуелсіздік алған кезден бері Қазақстан айтулы жарысқа үздіксіз қатысып келеді. 13 мәрте ұйымдастырылған әлем чемпионаттарында отандастарымыз 9 мәрте жеңіс тұғырына көтерілді. Тарқатып айтсақ, 3 алтын, 2 күміс және 4 қоланы қоржынға салдық. Барлығы – 9 жүлде. Біздің шаңғышылар арасынан Владимир Смирновтың шоқтығы биік болды. Ол 1993 жылы Швецияның Фалун қаласында қос күміс пен бір қола медальді иеленген еді. Смирнов 10 шақырымдық классикалық және 10 шақырымдық еркін тәсілде мәре сызығын екінші болып қиып өтсе, 30 шақырымдық классикалық әдісте үшінші орынға табан тіреді.
1995 жылы Канаданың Тандер-Бей қаласында 3 алтын және 1 қола медальді олжалаған Қазақстан құрамасы жалпы командалық есепте төртінші сатыға жайғасты. Алдымызда тек қысқы спорт түрлерінің алпауыттары – Ресей, Норвегия және Жапония. Бұл жүлделердің барлығын әйгілі шаңғышы Владимир Смирнов жеңіп алды.
Даңқты Владимир Смирнов үлкен спорттан қол үзгеннен кейін Қазақстанның шаңғышылары ұзақ жылдар бойы еңсе тіктей алмады. Түрлі додаларда біздің спортшылар жүлде алып жүргенімен, төрткүл дүниенің мықтылары бас қосқан жарыста жер сипап қалды. Мәселен, 1997-2011 жылдар аралығында ұйымдастырылған сегіз бірдей байрақты бәсекеден құралақан оралдық. Тек 2013 жылғы әлем чемпионатында туымыз қайта биікте желбіреді. Италияның Валь-ди-Фьемме қаласында ұйымдастырылған әлем чемпионатында 50 шақырымдық масс-стартта Алексей Полторанин қола медальді мойнына ілсе, дәл сол Полторанин өзінің командалық әріптесі Николай Чеботькомен бірге 6х1,5 шақырымдық еркін тәсілдегі командалық спринтте де үшінші орынды еншіледі.
Міне, содан бері бақандай алты жыл өтті. 2015 жылғы әлем чемпионаты Швецияның Фалунында өтсе, 2017 жылғы доданы Финляндияның Лахти қаласы қабылдады. Осы жарыстың екеуінде де командалық есепте Норвегия мен Германия көш бастады. Швецияда үшінші орынға жарыс қожайындары табан тіресе, Суоми елінде ресейліктер сол межеден көрінді. Өкінішке қарай, осы жарыстардың екеуінде де жерлестеріміздің жолы болмай, елге еңселері түскен күйде оралды. Енді таяу күндері Аустрияның Зефельд-ин-Тироль қаласында басталатын дүбірлі додада сол олқылықтың орны толады деп үміттенеміз.
Ғалым СҮЛЕЙМЕН,
«Egemen Qazaqstan»