Ашылатын зауыттардың қатарында Қарағанды облысындағы құны 30,6 млрд теңге болатын, ферросилиция шығаратын зауыт, Ақтөбе облысындағы құны 6,9 млрд теңгеге тең, керамика тақталарын өндіретін өндіріс ошақтары бар. Министрдің айтуынша, «қарапайым заттар экономикасын» дамыту мақсатында отандық кәсіпорындарды қолжетімді несиелендіруге 600 млрд теңге қарастырылады. Оның 400 млрд теңгесі өңдеу өнеркәсібіне бағытталуға тиіс. Сөйтіп халық тұтынатын отандық өнімдердің қатары 250-ге көбейеді. Оның ішінде жеңіл өнеркәсіпке жататын жиһаз өнеркәсібі, сондай-ақ құрылыс материалдары бар.
Биылғы жылдың еншісіне республикалық маңызы бар 4,4 мың шақырым жолды қайта жаңғырту жұмыстары да еніп отыр. Оның ішінде 518 шақырым жолға күрделі жөндеу жүргізілсе, 1190 шақырым автожолға орташа жөндеу жұмыстары жүргізіледі.
Аталған министрліктің құзыретіне кіретін маңызды салалардың бірі – халықты тұрғын үймен қамтамасыз ету. Биыл 13 млн шаршы метр тұрғын үй салу жоспарланып отыр. Нәтижесінде 118 мың отбасына жаңа баспананың кілті табыс етілмек. Оның ішінде 22 мың пәтер мемлекет қаржысы есебінен салынуға тиіс.
Министр Ж.Қасымбектің айтуынша, биыл Қазақстан экспортшыларына Қытай, Біріккен Араб Әмірліктері мен Иран нарықтарына шығу жеңілдейді.
− Экспортқа бағдарланған компанияларға Мемлекет басшысының тапсырмасына сәйкес қаржылық қолдаудан тыс көмек шаралары көрсетіледі. Экспорттаушыларға қолдаудың сервистік шараларын күшейту аясында ҚХР, БАӘ және Ираннан инспекциялық комиссияларды қазақстандық экспорттаушы кәсіпорындарға шақыру арқылы олардың нарықтарына шығуды жеңілдету көзделген, − деді ол.
Министр келтірген деректер бойынша, 2019-2021 жылдары экспорттаушыларды қолдау шараларын күшейту үшін 500 млрд теңге жұмсалады. Қаржылық және сервистік шараларды күшейту әкімшілік және сауда кедергілерін еңсеруге мүмкіндік береді. Бизнеске әлеуетті сатып алушыны таңдауға, көлік шығындарын төмендетуге жол ашады. Белгіленген шараларды табысты жүзеге асырған жағдайда шикізаттық емес тауар экспортының көлемін 2020 жылға қарай 1,5 пайызға, яғни 22,4 млрд долларға жеткізу жоспарланып отыр.
Министрлікке қарасты әр салаға қатысты оқылған баяндамалардан кейін Премьер-Министрдің бірінші орынбасары Асқар Мамин Қазақстанның сауда саясаты агрессивті бола түсуі тиіс екенін айтты.
– Ішкі және сыртқы саясат сияқты сауда саясаты да біршама агрессивті әрі проактивті болуы қажет. Қазірдің өзінде күрделі нарықтармен бәсекеге түсеміз. Таяу жылдары көршілеріміздің қарқынды дамуы есебінен қалыптасатын еркін экспорттық кеңістіктегі өсім барынша шектеулі болады. Соған дайын болу қажет, − деді бірінші вице-премьер.
Алқа мәжілісі отырысында Индустрияландыру, «Нұрлы жол» және «Нұрлы жер» мемлекеттік бағдарламаларын іске асыру, сондай-ақ шикізаттық емес экспортты, техникалық реттеуді, геология және жер қойнауын пайдалануды, көлік және логистиканы, азаматтық авиацияны, құрылыс пен тұрғын үй-коммуналдық шаруашылықты, инновация мен өнеркәсіпті цифрландыруды ілгерілету мәселелері қаралды.
P.S. Бет қатталып жатқанда Елбасы Жарлығымен Үкімет отставкаға кетіп, Премьер-Министрдің міндетін уақытша атқару Асқар Маминге жүктелді.
Еркежан АЙТҚАЗЫ,
«Egemen Qazaqstan»