«Қазір «Нұр Отан» партиясы «Атамекен» кәсіпкерлер палатасымен бірлесіп, бизнесті мемлекеттік қолдауды жақсартудың жолдарын қарастыруда. Мен бизнес те өз тарапынан әлеуметтік жауапкершілікті ұмытпауы тиіс деп ойлаймын. Қазір бизнес Елбасының «Нұр Отан» партиясы қамқорына алған «Бақытты отбасы» жобасына белсенді кірісіп кетті. Көп балалы отбасыларына баспанамен, отынмен, азық-түліктей материалдық көмек көрсетіп жатыр. Алдағы уақытта кәсіпкерлер әлеуметтік аз қорғалған отбасыларын жекелей қамқорлыққа алса, олардың қажеттерін уақытылы біліп отырса дұрыс болар еді» деді Архимед Бегежанұлы.
Бүгін облыс өңірінде төрт және одан да көп бала тәрбиелеп отырған 5086 отбасы бар. Олардың барлығы да ерекше бақылауымызда. Облыста, аудандар мен қалаларда жедел штабтар құрылған, олар адамдарға уақытылы кеңестер айтуға және олардың проблемаларын анықтауға даяр. Әрине, отбасыларынан түсетін өтініштердің басым көпшілігі баспанаға қатысты. Ең алдымен апатты жағдайдағы үйлерде тұрып жатқандарға көмек беріледі.
Нәзира ЖӘРІМБЕТ,
«Егемен Қазақстан»
Қостанай
