Кенші, металлургтердің талап-тілегі негізінде дайындалған бағдарлама бойынша биыл 75 адам пәтер алады. Жақында осы бағдарламаға қатысып, жеңілдетілген несие бұйырған тұрғындарға сертификаттар берілді. Сертификаттарды облыс әкімі Ермағанбет Бөлекпаев пен «Отбасы банкі» басқарма төрағасы Ләззат Ибрагимова табыс етті.
«Кеншілер мен металлургтерге жеңілдетілген ипотекалық несие беру екінші жыл жүзеге асып отыр. Бағдарламаға қатысушылар тізімін «АрселорМиттал Теміртау» АҚ көмір және болат департаменттерінің кәсіподағы жасақтады. «Отбасы банк» несие алуға ниет еткен алғашқылардың өтінішін мақұлдады. Биыл 75 отбасы пәтерге қол жеткізеді. «Отбасы банкпен» бірлескен жұмыс жалғасын табады. Сондай-ақ облыста жас мамандарға арналған ипотекалық бағдарламаны атап өту қажет. Бағдарламаның бүгінде географиялық ауқымы кеңейді. Осы жылы бағдарламаға Балқаш, Саран, Теміртау қалалары да қосылады. Әрі қарай моноқалалардағы жас мамандар мен жұмысшы жастарға ипотека беруді жолға қоямыз», деді Е.Бөлекпаев.
«Отбасы банк» АҚ басқарма төрағасы Ләззат Ибрагимова бағдарламаға қатысушыларды іріктеудегі кәсіподақтардың жұмысына ризашылығын білдірді. Сонымен бірге «АрселорМиттал Теміртау» компаниясының алда бағдарламаға қатысатындығына үмітті екенін жеткізді.
«Қарағанды облысы дегенде көз алдымызға кенші мен металлургтердің бейнесі келетіні рас. Бұлар – ерен еңбек адамдары. Зор құрметке лайық. Қандай кенші-металлургтің баспанаға мұқтаж екеніне іріктеу жасаған кәсіподақтарға алғыс айтқым келеді. Еңбек адамының барлық жағдайын кәсіподақтардан артық білетін ешкім жоқ. Қарағанды металлургия комбинатының басшылығы да бағдарламаға қатысып, қосымша ресурстар бөледі деген үмітіміз бар», деді Л.Ибрагимова.
Несие 15 жылға рәсімделеді. Жылдық мөлшерлемесі 5 пайыз. Биыл қарыздың ең жоғары сомасы 20 млн теңге. Пәтерді Қарағанды, Саран, Абай, Шахтинск, Теміртауда бастапқы және қайталама нарықтан сатып алуға болады.
Шахтада 8 жылдан бері жұмыс істейтін Артем Вожжов бағдарламаның тиімділігін, әлі де желісін үзбей жалғасуы қажеттігін айтады. Артем Шахтинск қаласынан үшбөлмелі пәтер алыпты. Отбасында екі баласы бар.
«Тентек» шахтасында шамамен 8 жылдан бері жұмыс істеп келемін. Бұған дейін ата-анаммен бірге тұрған едік. Енді бағдарлама арқылы баспаналы болдық. Шахтинск қаласында үш бөлмелі пәтер табылды. Бағдарлама өте тиімді. Мұндай бағдарламалардың болашақ үшін жалғасы болуы керек», дейді А.Вожжов.
Былтыр кеншілер мен металлургтердің баспана алуына 1,7 млрд теңге бөлініп, 134 отбасы пәтерлі болды. Биылғы қаржы көлемі 1 млрд 500 млн теңге.
Қарағанды облысы
