Отандық делегация өндірістік үдерістермен және компанияның жұмыс барысында қолданатын жаңа технологияларымен кеңінен танысты. Бұл сапар сапа мен өндіріс тиімділігін арттыратын үдерістердің бастауы болғандай.
Зауытқа сапар барысында «Агромашхолдинг KZ» АҚ, «Востокмашзавод» АҚ, «Камлит KZ» ЖШС, «Қазақстан агроинновациялық корпорациясы» ЖШС, «Рейман» ЖШС сияқты отандық машинжасау саласындағы кәсіпорындар құрамдас бөлшектердің әлеуетті жеткізушілерімен келіссөздер де жүргізді.
CLAAS комбайндарына ұсынылатын негізгі нұсқалардың кең ауқымы және қосымша функциялары мен жабдықтарын орнату жұмыстарының күрделілігін мейлінше ескере отырып, бұл үдерістердің өндіруші үшін оңайға соқпайтындығын аңғаруға болады. Онымен қоса өндірісті жоспарлау, бөлшектерді жеткізу логистикасы, негізгі құрастыру және орнату күрделілігі де қажырлы еңбекті қажет етеді.
Шынын айту керек, CLAAS комбайндары – әлемдегі ең күрделі ауылшаруашылық машиналарының бірі. Зауыт шығаратын астық жинағыш комбайндар 15 мыңға дейінгі жеке құрамдас бөлшектен құрастырылады. Бұл зауытта комбайнның тазалау жүйелері, негізгі және қайталама дәнді айыру жабдықтары, сондай-ақ астық бункерлері мен әртүрлі басқа да компоненттер құрастырылады және боялады.
Бұл жолғы іс-шара екі ел арасындағы серіктестікті барынша нығайтуға көмектеседі. Аграрлық саланы дамытып, ауылшаруашылық техникасын өндіруде Қазақстан мен CLAAS арасындағы ынтымақтастықтың маңыздылығын арттыра түспек.
