– Өңірде Мемлекет басшысының тапсырмасымен тұрғындардың қауіпсіздігін қамтамасыз ететін ауқымды іс-шаралар қолға алынды. Тұрғындардың өтінішін елеп-ескереміз. Бүгін пәтер алған отбасыларға амандық, саулық тілеймін. Табиғи апаттардан аман болайық. Барлық қиындық артта қалсын, – деді М.Ахметжанов.
Мемлекеттік қордан алғашқы тұрғын үй алғандардың қатарында көпбалалы Қапаров, Никулиндер отбасы болды. Жаңа үй тұрғындардың көңілінен шыққан. Өйткені пәтерді өздері таңдаған. Онда тұрмыста қажетті керек-жарақтың бәрі бар екен.
– Президент тапсырмасымен жергілікті әкімдік біздің мәселемізді көп күттірмей-ақ шешті. Табиғи апат айтып келмейді ғой. Мұндай жағдайда мемлекет көмектеседі деп сенгенімізбен, бұлай жылдам үйлі боламыз деп ойламадық. Отбасымыз үшін бүгін үлкен қуаныш. Балалар дән риза. Елде ахуал тұрақталған соң, өзге өңірлерде де біз секілді оқыс жағдайға тап болған тұрғындарға мемлекет көмектеседі деп сенеміз, – деді Сәуле Қапарова ағынан жарылып.
Мемлекет басшысының тапсырмасымен Ақмола облысында тасқыннан зардап шеккендерді қолдап, тұрғындардың мүлкін қалпына келтіру бойынша тиісті іс-шаралар қолға алынған. Яғни өңірде шығындарды өтеу тұрғын үй қатынастары туралы қолданыстағы заңнама шеңберінде жалғасады. Бірер күн бұрын облыс орталығындағы 174 отбасы жалпы сомасы 65 млн теңге шамасында біржолғы төлем алған. Сондай-ақ материалдық шығындарды бағалау және өтеу жөніндегі комиссия 12 отбасының 8 млн теңге көлемінде материалдық шығынын өтеу туралы шешім шығарған. Нақ қазір арнайы комиссия облыстағы өзге де тұрғын үйлердің жай-күйін бағалап, шығынды нақтылау үшін техникалық тексеру жұмыстарын жалғастырып жатыр.
