Биыл ғасырлық мерейтойын атап өтетін, журналистер «спорт басылымдары арасындағы БҰҰ-ның Бас Ассамблеясы» деп атап кеткен AIPS конгресі жыл сайын түрлі елдерде ротациялық негізде өткізіледі.
1924 жылы құрылған AIPS – спорт тақырыбына маманданған журналистердің халықаралық кәсіби ұйымы. Қазіргі уақытта оның 100-ден астам елден 8000-ға жуық мүшесі бар. Осы жолы 96 елден келген 230-дан астам делегат спорт басылымдары форумына қатысты.
86-AIPS конгресі аясында Қазақстан делегациясы 2024 жылғы 8-14 қыркүйек аралығында Астанада өтетін V Дүниежүзілік көшпелілер ойындарын таныстырды.
Делегация Дүниежүзілік көшпелілер ойындардың басты миссиясы – әлемдік этноспорт қозғалысын дамыту, жаһандану дәуірінде тарихи-мәдени мұраны және әлем халықтарының алуан түрлілігін сақтау, этноспорт түрлерін, әлем халықтарының дәстүрлі ойындары мен сайыстарын халықаралық аренада насихаттау, дінаралық және мәдениетаралық диалогті, әлем халықтары арасындағы өзара түсіністік, достық пен келісімді нығайту екенін түсіндірді. Қатысушыларға Қазақстан билігінің бұл іс-шараға ерекше мән беретіні де айтылды. Конгресс қатысушылар таныстырылымды зор ықыласпен тыңдады.
Халықаралық спорт басылымдары қауымдастығының президенті Джованни Мерлоның пікірінше, «Астанада Дүниежүзілік көшпелілер ойындарын өткізу Ұлы даланың ғасырлар бойғы бірегей мәдениетімен танысуға қолайлы мүмкіндік береді. Су тасқынына қарамастан, Қазақстан билігінің көшпелілер ойындарын өткізуден бас тартпағаны қуантады. Бұл Қазақстанда спортқа зор мән берілетінін айғақтайды».
– Біз өзіндік креативті стилі бар, әлеуеті зор Қазақстандағы спорт журналистикасын асқан қызығушылықпен бақылап отырмыз. Қазақстан делегациясы AIPS форумдарына белсенді қатысып, оның барысында өз бастамаларын тұрақты негізде ұсынып келеді, – деп атап өтті Халықаралық спорт басылымдары қауымдастығы Азия бөлімшесінің (AIPS ASIA) бас хатшысы Амджад Малик.
– Форумға қатысушылар алапат су тасқынына байланысты еліміздің бірқатар маңызды халықаралық іс-шарадан бас тартып, бюджет қаражатын үнемдегеніне қарамастан, Қазақстан әлі де Дүниежүзілік көшпелілер ойындарын өткізуге дайын екенін құптады, – деді Халықаралық спорт басылымдары қауымдастығы Азия бөлімшесінің (AIPS ASIA) атқарушы комитетінің мүшесі Ілияс Омаров.
Сондай-ақ AIPS конгресі аясында жаңа «Sport Plus Qazaqstan» телеарнасының тұсаукесері өтті. Сонымен қатар қазақстандық делегация өкілдері Қауымдастықтың 100 жылдығы шеңберінде тәжірибе алмасу мақсатында Қазақстанда жас тілшілер үшін (AIPS Young reports) халықаралық AIPS семинарын ұйымдастыруға дайын екенін жеткізді.
