Алдын ала мәлім етілген ақпаратта айтылғандай, мәртебелі жарысқа АҚШ, Қырғызстан, Өзбекстан, Әзербайжан, Түркия, Ресей, Тәжікстан, Қытай, Моңғолия, Ауғанстан, Венгрия және өз еліміздің көкпаршылары қатысып, жарыс көрігін қыздыруы тиіс болатын.
Атап өткеніміздей, жоғарыда аты аталған мемлекеттердің ішінен белгілі себептерге байланысты Әзербайжан көкпаршылары жарысқа келе алмай қалды. Қалған 11 команданың балуандары жасындай жарқылдап, астындағы аттарының ауыздығын қарш-қарш шайнатып алаңға шықты.
Бұдан бір ай бұрын жеребе тартылып, көкпаршыларды екі топқа жіктеп, анықтап қойған шешім бойынша, алғашқы болып Өзбекстан мен Тәжікстан командалары сайысты бастады. Нәтижесінде 3:0 есебімен тәжікстандық көкпаршылар өзбек бауырларды тізе бүктірді. Екінші болып алаңға беттеген Түркия және АҚШ елі құрамаларының ойыны сүреңсіздеу болғанымен, түрік бауырлар 7:1 есебімен жеңіс туын көтерді. Үшінші сайыс – Қазақстан және Ауғанстан командалары арасында өрбіді. Ауған бузашылары (көкпаршылары) әлекедей жаланған біздің жігіттерге титтей де қарсылық таныта алмады. Есеп – 9:2. Төртінші жұпқа түйіскен Әзербайжан мен Қытай жігіттері алаңға шығып, ат терлетіп шаршамады. Әзербайжан көкпаршылары жарысқа келмегендіктен, жеңіс қытайлық көкпақшылардың қанжығасына оп-оңай байланды.
Көкпардың соңғы жұбы – Қырзғыстан және моңғол елінің азаматтары көрермендерге нағыз сайысты көрсетті. Әсіресе, астындағы аттары үстіндегі балуанның тақым қағысын қалт жібермей жаттыққан қырғыз жылқыларының керемет айла-тәсілін көрген жұрт та, қарап отырған біз де сүйсіндік. Таулы жерде көкпар тартып жаттыққан қырғыздарға моңғолиялық азаматтар әжептәуір қарсылық танытты. Бірақ нәтиже – 4:0. Жеңіс қырғызстандықтар еншісіне бұйырды.
Жоғарыдағы бес кездесуді түйіндеп тастаған ұйымдастырушылар күн екінтіге таяғанда чемпионаттың ресми ашылу салтанатын өткізді. Әуелі, доданы тамашалауға жиналған нөпір жұртқа жамбы ату, теңге ілу, тазы жарыстыру сияқты ойындар көрсетіліп, соңында алыс-жақыннан ат арылтып келген көкпаршылар шеруі өтті.
Алғашқы болып сөз алған Мәдениет және спорт министрлігі Спорт және дене шынықтыру істері комитетінің төрағасы Елсияр Қанағатов бұған дейін халқымыздың асыл мұрасы – ұлттық ойын түрлерінен тек қана тоғызқұмалақтан әлемдік деңгейде жарыс өткізіліп келген болса, енді міне, қатарға көкпар қосылды дегенді атап өтіп, жиналған жұрт пен қазақ еліне ат басын бұрған сайыскерлерге алғысын білдірді.
Мәртебелі меймандар атынан пікір айту бақыты АҚШ-тың Қазақстандағы Төтенше және өкілетті елшісі Джорж Крол мырзаға бұйырып, елші өз тілегін көпшілікке қазақ тілінде жеткізді. «ЭКСПО көрмесі аясында өткізіліп отырған бұл жарысқа америкалықтардың шақырылуы екі мемлекет арасындағы жақсы байланыстың нәтижесі», деді елші мырза.
Салтанатты рәсімнің соңы концерттік бағдарламаға жалғасып, елімізге танымал өнер жұлдыздары өз өнерлерін паш етті.
Бекен ҚАЙРАТҰЛЫ,
«Егемен Қазақстан»