Кездесу барысында Д.Мыңбай Қазақстан халқы Ассамблеясының құрылу тарихымен, конституциялық мәртебесімен, қоғамдық келісім мен жалпыұлттық бірлікті нығайтудағы мақсатымен таныстырды. Сонымен қатар, Германия мен Қазақстан арасында қалыптасқан сенімді әрі ашық қарым-қатынасты, Қазақстан Республикасы Президенті Н.Назарбаев пен Федералды канцлер А.Меркельмен үздіксіз тікелей байланыста екендігін атап өтті.
«Германия – Қазақстанның маңызды әрі негізгі әріптестерінің бірі болып табылады. Біздің мемлекеттеріміздің арасындағы диалог сенімділікпен және ашықтықпен ерекшеленеді. 25 жыл ішінде екі ел арасындағы дипломатиялық қарым-қатынасты орнату барысында, біз сенімді және белсенді диалог алаңын құра алдық. Конрад Аденауэр атындағы қормен қарым-қатынасымыз осы серпінді өз деңгейінде ұстауға себеп бола алады», – деді Д.Мыңбай.
Қордың өкілдері Қазақстан тәжірибесінің тиімді екендігін және Ассамблеяның ұлтаралық тұрақтылықты және қоғамдық келісімді күшейтуде, республикада тұратын барлық этностардың құқықтарын қорғауда маңызды рөл атқаратынын ескеріп өтті. Сондай-ақ, Томас Хельм Қазақстанның этносаралық қатынасты гармонияда, ұлтаралық диалог пен бірлікті нығайтуда сөзсіз көшбасшы екендігін де назардан тыс қалдырмады.
Нұрлыбек ДОСЫБАЙ,
«Егемен Қазақстан»
