ЭКСПО қалашығы күтпеген тосынсыйлар жасап тұрады. Осының алдында да миллионыншы келуші мен екі миллионыншы келушіні дәл осылай күтіп алып, олардың газеттер мен телеэкрандардан көрінуіне жағдай жасаған. Сыйлық беруді де ұмытқан жоқ-тын. Бұл жолы да дәл солай болды. Юра ең алдымен БАҚ өкілдерінің сауалына жауап беріп, сосын ұйымдастырушылар атынан арнайы сыйлықтарды иеленді.
ЭКСПО-ның 3 миллионыншы қонағы мәскеулік Юрий Шурыгин Астанаға «Еуразия апталығы» аясында өтіп жатқан іс-шараларға қатысу үшін келген. Ол ЭКСПО-ның үш миллионыншы қонағы болып тіркелмей тұрып, бір күн бұрын қалашықты аралаған болып шықты. «Маған «Нұр әлем» павильоны қатты ұнады. Ал бүгін жұмыс кестем тығыз болса да, Ресей павильонын аралау үшін әдейі келген едім», – деген ол ЭКСПО көрмесінің Ресейдің Екатеринбург қаласында 2025 жылы ұйымдастырылуы мүмкін екенін, мұндай көрмелердің адамдарға жақсы әсер сыйлайтынын айтып өтті.
Ал «Астана ЭКСПО-2017» ҰК» АҚ төрағасы Ахметжан Есімов құрметті қонақты құттықтап, оған естелік сыйлықтар тарту етті. Төраға көрмеге келушілердің саны күн санап өсіп келе жатқанын мәлімдеді. Келушілердің 15 пайызының шетелдік қонақтар екенін, ал шетелдіктердің арасында ресейлік қонақтардың үлес саны көп екенін айтты.
Еске сала кетейік, ЭКСПО қалашығында миллионыншы мейман көрме басталған соң 31 күннен кейін тіркелген болса, екі миллионыншы қонақ тамыздың 4-і күні белгіленген.
Айгүл Сейіл,
"Егемен Қазақстан"