Биыл 10-шы рет ұйымдастырылып жатқан футбол аламанына 17 жасқа дейінгі жасөспірімдер құрамасы бақ сынауда. Жарысқа алыс-жақын шетелден келген сегіз құрама қатысып, турнир көрігін қыздырмақ. Олар төрт-төрттен екі топқа бөлінген. «А» тобында Қазақстан, Түрікменстан, Албания, Грузия құрамалары бақ сынаса, «В» тобында Қырғызстан, Тәжікстан, Ресей, Өзбекстан жасөспірімдері өзара мықтыны анықтайды.
Футболдан Қазақстан Республикасы Президенті кубогын жыл сайын дәстүрлі түрде ұйымдастырғанның арқасында бұл турнир 2011 жылдан бастап, ФИФА мен УЕФА-ның жасөспірімдер футболын дамыту күнтізбесіне еніп, жасөспірімдер құрамаларының айқасына айналды. Сол жылдан Қазақстан жастар құрамасының нәтижелері жақсара бастады. Айта кетсек, 2011 жылы жастар құрамамыз төртінші орын иеленсе, келесі жылы үздік үштікке еніп, Президенті кубогының қола жүлдегері атанды. Ал 2013 жылы жастарымыз айды аспанға бір-ақ шығарып, турнирдің бас жүлдесіне ие болды.
Былтыр Шымкент қаласында өткен Қазақстан Республикасы Президенті кубогында жастарымыз екінші рет чемпион атанды. Финалдық кездесуде Қазақстан құрамасы Тәжікстан құрамасын 2:1 есебімен жеңген болатын. Биыл Ресейде өткен Гранаткин турнирінің үздік шабуылшысы атанған Еркебұлан Сейдахмет дәл осы жарыста мергендігімен көзге түскен еді. Төрт кездесуде үш гол соғып, жарыс қорытындысы бойынша – ең үздік шабуылшы атанды. Ал команда капитаны Димаш Қашкен – ең үздік ойыншы мәртебесіне ие болған еді. Биылғы турнирде де отандастарымыз былтырғы биігінен түспейді деп сенеміз.
Әли БИТӨРЕ,
«Егемен Қазақстан»